شوکت حمید
سرینگر//جموں و کشمیر حکومت نے بدھ کو اسمبلی میں کہا کہ یونین ٹیریٹری کے 511 بے زمین افراد کو مکانات کی تعمیر کے لیے پانچ مرلہ اراضی فراہم کی گئی ہے جبکہ اس سکیم کے تحت 2568 درخواستوں کو مختلف بنیادوں پر مسترد کر دیا گیا ہے۔ایک سوال کے جواب میں حکومت نے کہا کہ کشمیر میں کل 234 اور جموںصوبے میں 277 مستحقین کو مفت زمین الاٹ کی گئی ہے۔ضلع بانڈی پورہ میں سب سے زیادہ 109 استفادہ کنندگان کو زمین فراہم کی گئی ہے اور ضلع بارہمولہ میں 61، ضلع اننت ناگ میں 30 افراد کو اراضی فراہم کی گئی ہے جبکہ صوبہ جموں میں ضلع راجوری میں 48 افراد کو، ضلع ڈوڈہ میں 68 اور ضلع کشتواڑ میں 55 افراد کو مکانوں کی تعمیر کے لئے اراضی فراہم کی گئی ہے تاہم شوپیاں، بڈگام اور رام بن اضلاع میں کسی کو یہ زمین فراہم نہیں کی گئی ہے۔حکومت نے کہا کہ اس سکیم کے تحت 2 ہزار 5 سو 68 درخواست دہندگان کو زمین کی الاٹمنٹ سے انکار کردیا گیا۔ضلع راجوری میں سب سے زیادہ 1 ہزار 2 سو 45 درخواست مسترد کئے گئے جبکہ اننت ناگ میں 286،ضلع رام بن میں 162 اور ضلع اودھم پور میں 146 درخواست مسترد کر دئے گئے۔حکومت کا کہنا ہے کہ درخواستوں کے مسترد ہونے کی وجوہات میں درخواست دہندگان کی اہلیت کے معیار پر پورا نہ اترنا، موجودہ رہائشی اراضی کے مالک ہونا ، جنگلات یا رکھ اور کھیتوں کے علاقوں میں رہائش پذیر ہونا یا پہلے سے ہی پانچ مرلہ سے زیادہ زمین کے مالک ہونا، شامل ہیں۔
