شگن پریہار سب سے کم ، عبدالرحیم راتھر سب سے عمر رسیدہ
سرینگر//یہ محض اتفاق ہے کہ پچھلی اسمبلی، 2018میں تین خواتین ایم ایل ایز تھیں، جبکہ اس سال بھی ان کی تعداد میں کوئی تبدیلی نہیں آئی ہے۔2014 میں، این سی کی شمیمہ فردوس اور پی ڈی پی کی آسیہ نقاش منتخب ہونے والی صرف دو خواتین تھیں لیکن پی ڈی پی کی صدر محبوبہ مفتی اپنے والد اور اس وقت کے وزیر اعلی مفتی محمد سعید کی وفات کے بعد 2016 کے ضمنی انتخابات میں منتخب ہونے کے بعد ایوان میں ان کے ساتھ شامل ہوئیں۔امسال شمیمہ فردوس نے اپنی حبہ کدل سیٹ برقرار رکھی جبکہ سکینہ مسعود ڈی ایچ پورہ سیٹ دوبارہ حاصل کرنے میں کامیاب ہوگئیں۔کشتواڑ سے شگن پریہار اس سال ان میں شامل ہوئی ہیں۔
پہلی بار منتخب
جموں و کشمیر اسمبلی کے 90 منتخب اراکین میں 51 ایسے ایم ایل ایز ہیں، جو پہلی بار منتخب ہوئے ہیں۔نیشنل کانفرنس کے پاس نئے ایم ایل ایز کی سب سے زیادہ تعداد 24 ہے۔بی جے پی کے پاس 15 پہلی بار منتخب ایم ایل ایز ہیں، جو کہ اس کی مجموعی تعداد کا نصف سے زیادہ ہے۔کانگریس کے پاس دو پہلی بار منتخب ایم ایل ایز ہیں۔ 7 آزاد امیدواروں میں سے 6 پہلی بار اس ایوان کے رکن بنے ہیں۔پی ڈی پی کے تینوں منتخب اراکین اور ایک عام آدمی پارٹی کے ایم ایل اے بھی اسمبلی میں نئے ہیں۔کئی نئے منتخب ایم ایل ایز ماضی میں لوک سبھا، راجیہ سبھا یا قانون ساز کونسل کے اراکین رہ چکے ہیں۔ ان میں سابق ہائی کورٹ کے جج اور این سی رہنما حسنین مسعودی شامل ہیں، جو 2019 سے 2024 تک لوک سبھا کے رکن رہے۔ پی ڈی پی کے رہنما میر محمد فیاض، جنہوں نے کپواڑہ سے انتخابی مقابلہ جیتا، 2015 سے 2021 تک راجیہ سبھا کے رکن رہے۔ 47 سالہ فیاض نے 2014 کے اسمبلی انتخابات میں صرف 151 ووٹوں سے شکست کھائی تھی۔این سی رہنما بشیر احمد ویری، سیف الدین بٹ، جاوید احمد مرچال، سرندر کمار چودھری اور شوکت حسین گنائی اوربی جے پی سے وکرم رندھاوہ، ماضی میں قانون ساز کونسل کے اراکین رہے ہیں۔
عمر رسیدہ اراکین
ادھر بی جے پی کی 29 سالہ شگن پریہار نو منتخب اراکین میں سب سے کم عمر جب کہ نیشنل کانفرنس کے عبدالرحیم راتھر سب سے عمر رسیدہ رکن ہیں۔پریہار، 30 سال سے کم عمر کی اسمبلی کی واحد رکن ہیں جبکہ چرا رشریف سے 7 بار ایم ایل اے رہ چکے راتھر سب سے عمر رسیدہ ہیں جنکی عمر 80سال ہے۔بانڈی پورہ سے کانگریس ایم ایل اے نظام الدین بٹ 77 سال کی عمر میں دوسرے سب سے معمر رکن ہیں اس کے بعد سی پی آئی(ایم) کے کولگام ایم ایل اے محمد یوسف تاریگامی ہیں جن کی عمر 75 سال ہے۔نیشنل کانفرنس کے عیدگاہ کے ایم ایل اے مبارک گل کی عمر 73 سال ہے، بیروہ کے ایم ایل اے محمد شفیع وانی، پٹن کے ایم ایل اے جاوید ریاض اور اننت ناگ کے ایم ایل اے پیر زادہ محمد سعیدسبھی 71 سال کے ہیں۔دیگر منتخب عمر رسیدہ افراد میں حسنین مسعودی، سرجیت سلاتھیااور بلدیو راج ہیں۔ اعداد و شمار کے مطابق10 سب سے کم عمر نو منتخب ایم ایل اے میں پی ڈی پی کے وحید پرہ (پلوامہ)، عام آدمی پارٹی کے معراج ملک(ڈوڈہ)، این سی کے مہر علی (کنگن)، آزاد رامیشور سنگھ(بنی)اور بی جے پی کے سنیل بھردواج (رام نگر)شامل ہیں۔ 23ایم ایل ایز کی عمریں 41 سے 50 سال کے درمیان ہیں، جب کہ 22 ممبران کی عمریں 61 سے 70 سال کے درمیان ہیں۔ چھ ایم ایل اے کی عمریں 40 سال سے کم ہیں، جن میں پریہار بھی شامل ہیں۔
