۔370کی یکطرفہ منسوخی خود بھاجپا کیلئے مضحکہ خیز : سوز

سرینگر// سابق وزیرو سینئر لیڈر پروفیسر سیف الدین سوز نے کہا ہے کہ مرکزی وزیر خزانہ کماری سیتھا رمن نے آئین ہند کی دفعہ 370 کی یک طرفہ منسوخی کو خود بی جے پی پارٹی اور مرکزی حکومت کیلئے مضحکہ خیز صورت حال میں پیش کیا ہے۔اپنے ایک بیان میں انہوں نے کہا کہ موجودہ مرکزی حکومت نے  دفعہ 370 کو غیر آئینی اور غیر قانونی طور منسوخ کیا ہے، اب دہلی میں حکمران جماعت سے وابستہ منسٹر فرداًفرداً غلط تعبیر سے آئین ہند کی اُس دفعہ کی منسوخی کو جائز قرار دے کر اپنے لئے خجالت پیدا کر رہے ہیں!دراصل آر ایس ایس ؍بی جے پی سنگھٹن کو خیال ہے کہ جھوٹ کو بار بار دہرا کر سچ بنایا جا سکتا ہے۔انہوں نے کہا کہ نہ صرف ہندوستان کے لوگ بلکہ بین الاقوامی سطح پر لوگ جانتے ہیں کہ مرکزی سرکار نے اس ضمن میں قانون اور آئین کے خلاف کام کیا ہے۔ اس سلسلے میں یہ بات یقینی ہے کہ جموںوکشمیر کے لوگ اس دفعہ کی بحالی کیلئے مضبوط جمہوری تحریک میں شامل ہو گئے ہیں ۔ سرکار میں شامل لوگ اپنی مجبوری میں سوچتے ہیں کہ اُن کو یہ پروپگنڈا کام آئے گا کہ اس دفعہ کی منسوخی  لوگوں کیلئے فائدہ مند ہے۔انہوں نے کہا کہ سیتھا رمن نے بی جے پی کے دوسرے لوگوں کی طرح واضح طور جھوٹ بولا ہے کہ اس دفعہ کی منسوخی کے بعد کشمیر میں بہت ترقی ہوئی ہے اور لوگوں کیلئے بھلا ہوا ہے۔اگر سیتھا رمن لوگوں کیلئے صرف ایک فائدے کا ذکر کرتی تو انفرادیت واضح ہو جاتی۔