عظمیٰ نیوز سروس
ایودھیا //ایودھیا کا وہ منظر تو جیسے خواب جیسا لگتا ہے۔ سوچو، پورا شہر روشنی میں نہا گیا ہو — پینتیس لاکھ دیے ایک ساتھ جل رہے ہوں، جیسے زمین پر ستارے اتر آئے ہوں۔سوچو، سر یو ندی کے کنارے ‘‘جے شری رام’’ کے نعرے گونج رہے ہوں، ہیلی کاپٹر سے پھول برس رہے ہوں، اور نیپال، تھائی لینڈ، ملیشیا جیسے ملکوں کے فنکار رام لیلا پیش کر رہے ہوں۔ پورا ایودھیا عقیدت، روشنی اور خوشی میں ڈوبا ہوا تھا۔یہ صرف ایک تہوار نہیں تھا، بلکہ ایک تاریخی لمحہ تھا — جہاں ایمان، محبت اور روشنی ایک ساتھ چمک اٹھے۔ اتر پردیش کے وزیر اعلیٰ یوگی آدتیہ ناتھ کو اتوار کے روز ایودھیا میں منعقد شاندار دیپوتسو تقریب کے دوران قائم ہونے والے دو نئے گنیز ورلڈ ریکارڈز کی سرکاری توثیق موصول ہوئی۔ یہ تقریب محکمہ سیاحت حکومت اتر پردیش اور ضلعی انتظامیہ ایودھیا کے اشتراک سے منعقد کی گئی تھی۔ان عالمی ریکارڈز میں پہلا ریکارڈ سر یو ندی کے کنارے 26,17,215 دیوں کو روشن کرنے کا ہے جو دنیا میں تیل کے دیوں کی سب سے بڑی نمائش ہے۔ دوسرا ریکارڈ ایک ہی وقت میں سب سے زیادہ افراد کے ذریعے ’دیا گھمانے‘ کی رسم ادا کرنے کا ہے۔ یہ دونوں ریکارڈ ایودھیا کی روحانی اور ثقافتی بحالی کی علامت ہیں جو یوگی آدتیہ ناتھ کی قیادت میں نئی بلندیوں کو چھو رہی ہے۔
