عظمیٰ نیوز سروس
سرینگر// ایک تازہ ترین پیشرفت میں، جموں و کشمیر بورڈ آف سکول ایجوکیشن کے 30 اپریل 2025 تک 12ویں جماعت کے سالانہ امتحانات کے نتائج کا اعلان کرنے کا امکان ہے۔سکول ایجوکیشن ڈیپارٹمنٹ کے ایک اعلیٰ عہدیدار نے بتایا کہ وزیر تعلیم نے بورڈکے لیے اپریل کے آخر تک 10ویں اور 12ویں جماعت کے امتحانات کے نتائج کا اعلان کرنے کی آخری تاریخ مقرر کی ہے۔انہوں نے کہا” تازہ ترین صورتحال کے مطابق، بورڈ حکام نے 12ویں جماعت کے نتائج کو ترجیح دی ہے اور 95 فیصد امکانات ہیں کہ نتیجہ 30 اپریل تک اعلان کر دیا جائے گا، اگر معاملات ٹھیک رہے تو نتیجہ دو دن پہلے اعلان کر دیا جائے گا،” ۔عہدیدار نے کہا کہ 12ویں جماعت کے نتائج کو ترجیح دی گئی ہے کیونکہ باہر جانے والے طلبا کو اعلیٰ تعلیمی اداروں میں داخلہ لینا ہوتا ہے۔انہوں نے کہا”دسویں جماعت کے نتائج کے اعلان کا عمل ساتھ ساتھ جاری ہے۔ 10ویں جماعت کے امتحانات کے نتائج کا اعلان 12ویں جماعت کے امتحانات کے نتائج کے فورا بعد کیا جائے گا،” ۔اہلکار نے بتایا کہ 12ویں جماعت کے امتحان کے سوالیہ پرچوں کی جانچ 14 اپریل 2025 کو مکمل ہوئی تھی جس کے بعد نتیجہ کمپیوٹنگ کے عمل کے لیے بھیج دیا گیا تھا۔انہوں نے کہا”دسویں جماعت کے طلبا کے سوالیہ پرچوں کی جانچ اتوار تک مکمل ہونے کی امید ہے۔ دسویں جماعت کے طلبا کے لیے مکمل کی گئی جانچ کا حصہ بھی کمپیوٹنگ ایجنسی کو بھیج دیا گیا ہے۔ یہ عمل ایک ساتھ جاری ہے۔ ہماری کوشش ہے کہ نتائج کا اعلان وقت پر کیا جائے،” ۔عہدیدار نے مزید کہا کہ گیارہویں جماعت کے سوالیہ پرچوں کی 75 فیصد جانچ بھی مکمل ہو چکی ہے۔لیکن 11ویں جماعت کے نتائج کا اعلان 12ویں اور 10ویں کے بعد کیا جائے گا۔
