سرینگر// گورنمنٹ ڈگری کالج پلوامہ میں فورسز اہلکاروں کی یلغار کے خلاف مظاہرہ کررہے کالج طلبہ کے خلاف کارروائی میں پیلٹ، ٹیر گیس اور فورسز اہلکاروں کی شدید مارپیٹ سے زخمی ہوئے 5 نوجوانوں کو سرینگر کے صدر اسپتال او ر شیر کشمیر میڈیکل انسٹیچوٹ منتقل کیا گیا ہے۔ صدر اسپتال کے شعبہ چشم کے وارڈ نمبر 8میں تعینات عملہ پلوامہ میں کالج پر فورسز اہلکاروں کی یلغار میں زخمی ہونے والے طالب علموںکی آنکھوں کو بچانے میں جڑ گئے ہیں۔ پلوامہ میں طالب علموںکے خلاف پیلٹ اور ٹیر گیس شلوں کی برسات میں زخمی ہونے والے 4زخمی نوجوانوں میں تین کی دائیں آنکھ میں پیلٹ لگے ہیں جبکہ ایک نوجوان ٹیر گیس شل لگنے کی وجہ سے زخمی ہوگیا ہے۔ آنکھوں میں پیلٹ لگنے سے زخمی ہونے والوں میں رئیس احمد گنائی ، عادل احمد ، آکاش عمر وانی کی آنکھوں میں پیلٹ لگے ہیں جبکہ ذیشان بٹ فورسز اہلکاروں کی مارپیٹ کے دوران سر پر ڈنڈا لگنے کی وجہ سے زخمی ہوگیا ہے۔ ذیشان بٹ نامی طالب علم نے کشمیر عظمی کو واقعہ کی تفصیلات دیتے ہوئے بتایا کہ کالج میں زیر تعلیم طالب علموں کو گرفتار کرنے کیلئے فورسز اہلکاروں نے کالج کے باہر ناکہ لگایا تھا ۔ ذیشان بٹ نے بتایا کہ کالج میں امتحانات جاری تھے اسلئے تمام طالب علموں کی شرکت لازمی تھی مگر فورسز اہلکاروں نے ہفتہ کو صبح ہی کالج کے باہر ناکہ لگایا اور کالج آنے والے طالب علموں کی مارپیٹ کا سلسلہ شروع کیا ۔ ذیشان نے بتایا ’’ کالج کے باہر مظاہرہ چل رہا تھا جبکہ کالج کے اندر طلبہ و طالبات امتحانات میں مصروف تھے۔ ذیشان بٹ نے بتایا کہ فورسز اہلکاروں نے کالج میں گھس کر نہ صرف طالبہ اور طالبات کی شدید مارپیٹ کی بلکہ کالج میں تعینات اساتذہ کو بھی نہیں بخشا گیا ۔ذیشان بٹ نے بتایا کہ فورسز اہلکاروں نے کالج کے اندرشلنگ کرنے کے علاوہ طلبہ اور اساتذہ کی مارپیٹ کی ۔ کالج کے ایک اور طالب علم نے نام ظاہر نہ کرنے کی شرط پر بتایا کہ فورسز اہلکاروں کی طرف سے طالبات کے ساتھ دست درازی اور مارپیٹ کے بعد کالج میں موجود تمام طلبہ نے احتجاج کا سلسلہ شرو ع کیا جس میں شامل طالبہ کو منتشر کرنے کیلئے فورسز اہلکاروں نے پیلٹ، ٹیرگیس اور پاوا شل کا بے تحاشہ استعمال کیا جس میں متعدد افراد ذخمی ہوئے ۔ مذکورہ طالب علم نے بتایا کہ کالج میں 25طالب عمل پیلٹ لگنے کی وجہ سے زخمی ہوئے ہیں جن میں دو طالبات بھی شامل ہیں۔ صدر اسپتال کے شعبہ چشم کے سربراہ ڈاکٹر طارق قریشی نے بتایا’’ ہفتے کو3طالب علموں کو اسپتال میں داخل کیا گیا جو پیلٹ لگنے کی وجہ سے زخمی ہوئے ہیں۔‘‘ ڈاکٹر طارق قریشی نے کہا کہ اسپتال میں داخل کئے گئے4نوجوانوں میں سے تین کی دائیں آنکھ میں پیلٹ لگے ہیں تاہم تینوں نوجوانوں کی آنکھ کی پتلی محفوظ ہے اور چند دنوں کے اندر ہی صحت یاب ہونگے۔ زخمی ہونے والے ایک اور نوجوان کو میڈیکل انسٹیچوٹ منتقل کیا گیا ہے۔ سکمز ذرائع نے بتایا کہ پلوامہ کے زخمی طالب عمل کا نام یاور احمد ہے جو ناک میں ٹیر گیس شل لگنے کی وجہ سے زخمی ہوا ہے۔ اس کی حالت مستحکم ہے۔
۔3طلباء کی آنکھیں پیلٹ کا نشانہ بنیں
