سرینگر//حریت(ع)چیئرمین اور عوامی مجلس عمل کے سربراہ میرواعظ عمر فاروق نے اعلان کیاہے کہ امسال 21مئی کی تقریب مشترکہ مزاحمتی قیادت کے زیر اہتمام یوم تجدید عہد کے طور پر منائی جائے گی جس کے دوران تحریک آزادی کے حوالے سے عزم کا اعادہ کیا جائے گا۔میرواعظ عمر فاروق عوامی مجلس عمل کے مرکزی زعما، عہدے داروں ،ضلع صدور ، سرکردہ کارکنوں ، مختلف اضلاع کے ڈیلی گیٹس کے ایک اہم اجلاس پارٹی سے خطاب کررہے تھے ۔اجلاس میں بانی تنظیم شہید ملت میرواعظ کشمیر مولوی محمد فاروق،21 مئی 1990ء حول سانحہ کی۲۷ویں برسی کی تقریبات کو حتمی شکل دی گئی۔میرواعظ نے کہا کہ لاکھوں شہداء کے خون سے مزین تحریک تاریخ کے ایک نازک مرحلے پر کھڑی ہے اور ایسے حالات میں جبکہ سرکاری سطح پر حریت پسند قیادت خصوصاً نوجوانوں اور طلبہ کی پر امن سرگرمیوں کو طاقت اور تشدد کے بل پر دبانے کی کوششیں جا رہی ہیں ،حریت پسند کارکنان اور تنظیمی عہدیداران کو جیلوں میں مقید اور یہاں کی نوجوان نسل کو پشت بہ دیوار کرنے کیلئے مختلف حربے استعمال کئے جارہے ہیں ۔ ایسے میں ہفتہ شہادت کی تقریبات ایک منظم اور مربوط حکمت عملی کے ساتھ منانا وقت اور حالات کا ناگزیر تقاضا ہے اور کشمیر کے حریت پسند عوام اور نوجوان جنہیں ہر سطح پر ریاستی دہشت گردی اور ظلم و جبر کا سامنا ہے کو رواں تحریک مزاحمت کے تئیں یکسوئی ، استقامت اور وابستگی کے اظہار کاحوصلہ فراہم ہوسکے۔ میرواعظ نے کہا کہ ہمارے جملہ حقوق کوطاقت کے بل پر سلب کر لیا گیا ہے یہی وجہ ہے کہ اب کشمیری نوجوان سڑکوں پر آنے کیلئے مجبور ہو گئے ہیں ۔ انہوں نے کہا کہ گرفتاریوں ، قدغنوں ،پابندیوں اور نظر بندیوں سے ہمارے حوصلوں کو توڑا نہیں جا سکتا ۔ میرواعظ نے کہا کہ مسئلہ کشمیر کے حل کے لئے بھارت پر امریکہ ، ترقی ، چین اور ایران سمیت اقوام متحدہ کا دبائو روز بروز بڑھ رہا ہے اسی لئے بھارت اور اس کی ریاستی اتحادی حکمران پوری قوت کے ساتھ تحریک آزادی کو کچلنے کیلئے وہ تمام حربے استعمال کر رہے ہیں جو کچھ ان کے بس میں ہے۔ انہوں نے کہا کہ کشمیری عوام کے تمام طبقے مسلکی اور طبقاتی دائروں سے اوپر اٹھ کر تحریک کے تئیں یک زبان ہیں اسلئے بھارت کو نوشتہ دیوار پڑھ کر اب یہ حقیقت تسلیم کر لینی چاہئے کہ کشمیری قیادت اور عوام اپنے موقف سے ہرگز دستبردار نہیں ہونگے۔ انہوں نے کہا کہ 21مئی 2017کے قومی دن کے موقعے پر عوام اپنے جذبات اور احساسات کا ایک بار پھر کھل کر اظہار کریں گے کیونکہ عوام کو اپنے پیدائشی حق حق خودارادیت سے کم کوئی چیز ہرگز قابل قبول نہیں ہے۔ میرواعظ نے کہا کہ جس بلند نصب العین کے حصول کیلئے عوام کے قدآور قائد شہید رہنما سمیت ہمارے ہزاروں شہداء نے اپنی قیمتی جانوں کا نذرانہ پیش کر کے حریت اور آزادی کی تاریخ میں ایک درخشاں باب رقم کیا ہے اسی جذبے اور ایثار و قربانی کی روح کو تازہ رکھنے کیلئے ہفتہ شہادت کی تقریبات پورے جوش و جذبے ، عزم و استقلال اور بلند حوصلوں کے ساتھ منایا جائے گااور حصول مقصد تک اپنی پر امن جدوجہد جاری رکھنے کے تئیں تجدید عہد کیا جائے گا۔
۔21مئی کی تقریبات: کشمیری عوام مسلکی اور طبقاتی دائروں سے بالاتر
