ترال+اننت ناگ //ترال میں 18 گھنٹو ں کے دوران مشتبہ جنگجوئوں کی جانب سے چار مقامات پر حملے کئے گئے جس کے دوران دن دھاڑے ایک جوان سال خاتون کو ہلاک اور دیگر ایک کو شدید زخمی کیا گیا جبکہ سی آر پی کا ایک افسر گرینیڈ دھماکہ میںمضروب ہوا۔ دو مقامات پر دوران شب توڑ پھوڑ کی گئی ہے۔اس دوران آرونی بجبہاڑہ میں اتر پردیش کے ایک دوکاندار کو گولی مار کر ہلاک کردیا گیا۔جنوبی کشمیر کے سب ڈویژن ترال میںسنیچر کی شام آٹھ بجے سے اتوار سہ پہر چار بجے تک تقریباً18 گھنٹوں کے دوران اسلحہ برداروں نے پے در پے حملے گئے۔پولیس کے مطابق مشتبہ جنگجوئوں نے سیر جاگیرترال گائوں میںدن کے بارہ بجے کے قریب ایک خاتون روبی جان زوجہ محمد شفیع وگے کو پستول سے گولی مار کر بری طرح زخمی کیا جبکہ ان کے گھر میں بطور مہمان ٹھہری 30سالہ یاسمینہ جان دخترغلام رسول بٹ ساکن کھنموہ پانپورہ کو گولی لگی جسے فوری طور ترال ہسپتال پہنچایا گیا تاہم بعد میں یاسمینہ جان زخموں کی تاب نہ لاکر دم توڑ بیٹھی۔جبکہ روبی جان کو مزید علاج ومعالجے کے لئے سرینگر منتقل کیا گیا ۔ پولیس کے مطابق روبی جان اپنے صحن میں کپڑے دھو رہی تھی جس کے دوران یہ حملہ ہوا ۔ پولیس کے مطابق ابتدائی تحقیقات سے محسوس ہوتا ہے مہمان ٹارگٹ نہیں تھی۔پولیس نے جائے وقوع سے پستول کے تین خول بر آمد کئے ہیں۔اتوار کو ہی سہ پہر تین بجے کے قریب نا معلوم افراد نے ترال بالا میں نیشنل کانفرنس کے لیڈر محمد اشرف بٹ کے صحن میں ایک ہتھ گولہ پھنکا جو زور دار دھماکے کے ساتھ پھٹ گیا جس کی وجہ سے پورا ترال لرز اٹھا ۔گرینیڈ دھماکے میں انکی حفاظت پر مامور180بٹالین سی آر پی ایف سے وابستہ اسسٹنٹ سب انسپکٹرعلی محمد شیخ زخمی ہوا تاہم کنبے کے تمام افراد اس حملے میں محفوظ رہے۔ واضح رہے کہ سنیچر اور اتوار کی درمیانی شب ہی نا معلوم بندوق بردار پی ڈی پی کے زونل صدر محمد اشرف رفیقی ساکن ڈاڈسرہ کے گھر میں داخل ہوئے اور گھریلو سامان تہس نہس کر کے فرار ہوئے ۔ انہوں نے ہوا میں کئی گولیا ںبھی چلائیں ۔جسکی وجہ سے ڈاڈسرہ میں زبردست خوف و ہراس پھیل گیا ۔ادھر دوران شب بٹہ گنڈ ترال گائوں میں جموں کشمیر پولیس کے ایک افسر کے گھر میںاسلحہ بردار گھس گئے اور وہاں توڑ پھوڑ کی۔ یہ امر قابل ذکر ہے کہ دو روزقبل ایم ایل اے ترال مشتاق احمد شاہ کے رہائشی مکان پر گرینیڈ حملہ کیا گیاتھا جس میں کوئی جانی نقصان نہیں ہوا تھا۔ ادھر اتوار کی رات قریب 8بجے آرونی بجبہاڑہ میں پچھلے6سال سے مقیم دوکاندار( خوانچہ فروشی) اپنی کرایہ کی دوکان پر بیٹھا تھا جس کے دوران 2نا معلوم اسلحہ بردار نمودار ہوئے اور انہوں نے شاکر بھائی کے نام سے جاننے والے خوانچہ فروش کو گولیاں مار کر ہلاک کردیا۔معلوم ہوا ہے کہ شاکر بھائی اتر پردیش کا رہنے والا ہے اور وہ پہلے زینہ پورہ اور پچھلے 6سال سے آرونی میں اپنے اہل خانہ کے ہمراہ کرایہ پر رہ رہا تھا۔اسکے ہاں دو بیٹے بھی ہیں۔اسکی ہلاکت کی وجہ معلوم نہیں ہوسکی ہے۔
۔18گھنٹوں میں 5حملے: ترال اور آرونی میں خاتون و خوانچہ فروش ہلاک
