یو این آئی
سرینگر// محکمہ موسمیات کی پیش گوئی کے مطابق جموں وکشمیر میں اگلے 3 دنوں کے دوران کئی مقامات پر بارشوں کا امکان ہے جبکہ اس دوران صوبہ جموں کے کچھ علاقوں اور کشمیر میں کہیں کہیں بھاری بارشیں ہوسکتی ہیں۔محکمے نے اپنی ایڈوائزری میں کہا کہ 17 سے 19 اگست کوجموں اور کشمیر صوبوں میں کچھ مقامات پر تیز اور بھاری بارشوں کا امکان ہے اور اس دوران کہیں کہیں سیلابی ریلے آنے ، بادل پھٹنے ،لینڈ سلائنڈنگ اور پتھر کھسک آنے کے بھی خطرات ہیں۔متعلقہ محکمے کے ایک ترجمان نے بتایا کہ 17 سے 19 اگست تک کئی مقامات پر گرج چمک کے ساتھ ہلکی سے درمیانی درجے کی بارشوں کا امکان ہے جبکہ اس دوران کہیں کہیں تیز ہوائوں کے ساتھ بھاری بارشیں ہوسکتی ہیں۔ان کا کہنا ہے کہ بعد ازاں 23 سے 25 اگست تک کئی مقامات پر ہلکی سے درمیانی درجے کی بارشوں کا ایک اور مرحلہ متوقع ہے ۔محکمے نے اپنی ایڈوائزری میںلوگوں سے کہا کہ وہ ندی نالوں، دریائوں اور کمزور تعمیراتی ڈھانچوں کے نزدیک جانے سے احتیاط کریں۔محکمے کے مطابق جموں وکشمیر کے کچھ اضلاع میں گذشتہ 24 گھنٹوں کے دوران نمایاں بارش ریکارڈ ہوئی ۔اس دوران اودھم پور میں 97 ملی میٹر، کٹھوعہ میں 35 ملی میٹر، ریاسی میں 23 ملی میٹر اور جموں میں 20.6 ملی میٹر بارش ریکارڈ کی گئی ۔
