یو این آئی
واشنگٹن//امریکی صدر ڈونلڈ ٹرمپ نے مذاکرات میں روس کو آسان فریق قرار دے دیا۔امریکی صدر ڈونلڈ ٹرمپ نے کہا ہے کہ دونوں ممالک کے درمیان امن کی کوششوں میں روس کے مقابلے میں انھیں یوکرین کے ساتھ نمٹنا زیادہ مشکل لگ رہا ہے۔ٹرمپ نے جمعہ کو اوول آفس میں صحافیوں سے گفتگو میں کہا کہ امریکا روس کے ساتھ بہت اچھا کام کر رہا ہے اور کیف کے مقابلے میں ماسکو کے ساتھ معاملہ کرنا آسان لگ رہا ہے۔انہوں نے مزید کہا کہ روس وہی کر رہا ہے جو اس حالت میں کوئی دوسرا کرتا، مضبوط پوزیشن میں ہونے کے باوجود روس معاہدے کے لیے تیار ہے جب کہ یوکرین کے ساتھ معاملات طے کرنا آسان نہیں ہے۔ٹرمپ نے کہا کہ انھیں یقین ہے کہ ولادیمیر پیوٹن جنگ ختم کرنا چاہتے ہیں، لیکن وہ یوکرین کے بارے میں یہ یقین سے نہیں کہہ سکتے۔ واضح رہے کہ اس سے محض چند ہی گھنٹے قبل ڈونلڈ ٹرمپ نے کہا تھا کہ وہ یوکرین کے ساتھ جنگ بندی تک روس پر بڑے پیمانے پر پابندیوں اور محصولات کے نفاذ پر سختی سے غور کر رہے ہیں۔دریں اثنا، خلائی ٹیکنالوجی کمپنی میکسار نے بی بی سی ویریفائی کو بتایا ہے کہ امریکا نے کچھ سیٹلائٹ تصاویر تک یوکرین کی رسائی کو عارضی طور پر معطل کر دیا ہے، جب کہ ٹرمپ کی جانب سے پہلے ہی یوکرین کی فوجی امداد روکی جا چکی ہے۔اس دوران ٹرمپ نے کہا ہے کہ روس اس وقت یوکرین کی پٹائی کر رہا ہے اور میں روس پر بڑے پیمانے پر بینکنگ پابندیاں اور درآمدی محصولات لگانے پر سختی سے غور کر رہا ہوں۔ ٹرمپ نے جمعہ کے روز سوشل میڈیا سائٹ ٹروتھ پر ایک پوسٹ میں کہااس حقیقت کی بنیاد پر کہ روس اس وقت میدان جنگ میں یوکرین کی پوری طرح پٹائی کررہا ہے، میں سختی سے روس پر بڑے پیمانے پر بینکنگ پابندیاں، پابندیاں اور ٹیرف لگانے پر غور کر رہا ہوں جب تک کہ جنگ بندی اور حتمی امن معاہدہ نہیں ہو جاتا۔انہوں نے روس اور یوکرین پر زور دیا کہ وہ اب مذاکرات کی میز پر آئیں، اس سے پہلے کہ بہت دیر ہو جائے۔
