جے کے کنٹریکٹرز کوآرڈی نیشن کمیٹی کا وفد وزیراعلیٰ کے مشیر سے ملاقی
سرینگر//جموں و کشمیر کنٹریکٹرز کوآرڈی نیشن کمیٹی کے چیئرمین غلام جیلانی پرزا کی قیادت میں ایک وفد نے وزیراعلیٰ کے مشیر ناصر اسلم وانی سے ملاقات کی اور انہیں ایک تفصیلی میمورنڈم پیش کیا جس میں یوٹی بھر کے ٹھیکیداروں کو درپیش دیرینہ اور سنگین مسائل کو اجاگر کیا گیا۔ پرزا نے کہا، “کشمیرکے ٹھیکیداروں کو ستمبر 2014 کے تباہ کن سیلاب کے دوران بھاری مالی نقصان کا سامنا کرنا پڑا۔ اس وقت عوامی انفراسٹرکچر کی فوری بحالی ترجیح تھی اور ٹھیکیداروں نے ہنگامی بنیادوں پر کام کرکے اپنی ذمہ داری نبھائی۔ افسوس کی بات ہے کہ اْس وقت بغیر کسی رسمی کاغذی کارروائی کے نیک نیتی سے انجام دیے گئے سینکڑوں منصوبوں کی آج تک ادائیگی نہیں ہوئی۔اگرچہ حکومت نے بل جمع ہونے کے 48 گھنٹوں کے اندر ادائیگی کا وعدہ کیا تھا، لیکن یہ وعدہ وفا نہیں ہو سکا۔۔خام مال کی عدم دستیابی پر بھی تشویش کا اظہار کرتے ہوئے انہوں نے کہا، “ترقیاتی کاموں پر اس کا شدید اثر پڑ رہا ہے۔ اس مسئلے کی جڑ محکمہ جیالوجی اینڈ مائننگ ہے، جو بارہا قانونی طریقے سے لے جائے جانے والے خام مال کو لے جانے والی گاڑیوں کو ضبط کر رہا ہے۔ پرزا نے شہر سرینگر کی 18 فٹ چوڑی مرکزی سڑکوں کو سری نگر میونسپل کارپوریشن (SMC) میں ضم کرنے کے فیصلے کی سخت مخالفت کرتے ہوئے کہا، “SMC کے پاس نہ تو مطلوبہ انفراسٹرکچر ہے اور نہ ہی وسائل کہ وہ اس اضافی ذمہ داری کو سنبھال سکے۔پرزا نے امید ظاہر کی کہ حکومت ان دیرینہ مسائل کے حل کے لیے فوری اقدامات کرے گی اور ٹھیکیدار برادری کو درکار مدد فراہم کرے گی۔
