یونس خان کی لارڈز میں عزت افزائی

لندن ، 19 مئی (یو این آئی) گزشتہ سال انگلینڈ کے خلاف لارڈز میں بے مثال کارکردگی دکھانے والے عظیم پاکستانی بلے باز یونس خان کی لارڈز میں عزت افزائی کی گئی جہاں انہوں نے وزڈن لیدر باؤنڈ ایڈیشن وصول کیا۔یونس خان کو یہ اعزاز گزشتہ سال انگلینڈ کے خلاف اوول میں کھیلے گئے سیریز کے چوتھے اور آخری ٹیسٹ میچ کے دوران 218رنز کی شاندار اننگز کھیلنے پر پیش کیا گیا جس کی بدولت پاکستان سیریز 2۔2 سے برابر کرنے میں کامیاب رہا تھا اور وہ دیگر چار کھلاڑیوں کے ہمراہ وزڈن کرکٹرز کے 2017 ایڈیشن میں جگہ بنانے میں بھی کامیاب رہے تھے ۔تقریب کے دوران یونس خان نے اس اعزاز کو اپنے کیلئے باعث فخر قرار دیا۔اس موقع پر پاکستانی ٹیم کے کوچ مکی آرتھر، ون ڈے و ٹی20 ٹیم کے کپتان سرفراز احمد سمیت ٹیم کے متعدد کرکٹرز بھی موجود تھے جنہوں نے عمدہ کارکردگی پر یونس خان کو خراج تحسین پیش کیا۔یاد رہے کہ گزشتہ دورہ انگلینڈ میں یونس خان مسلسل ناکامیوں کے سبب شدید دباؤ کا شکار تھے لیکن سیریز کے آخری ٹیسٹ میچ میں انہوں نے ایک مرتبہ پھر اپنی عظمت کا ثبوت دیتے ہوئے 218رنز کی شاندار اننگز کھیلی جس کی بدولت انگلینڈ کی پہلی اننگز کے اسکور 328 رنز کے جواب میں پاکستانی ٹیم نے 542 رنز کا بڑا اسکور بنایا۔اس اننگز میں اسد شفیق کی 109 رنز کی شاندار پاری بھی شامل تھی جس کی بدولت پاکستان نے 214رنز کی برتری حاصل کرنے کے بعد میچ میں باآسانی دس وکٹ سے فتح اپنے نام کر لی تھی۔