ایم ایم پرویز
رام بن//یوم جمہوریہ سے قبل جمعرات کو سری نگر جموں قومی شاہراہ سمیت ڈوڈہ، کشتواڑ اور رام بن ضلع میں سیکورٹی سخت کر دی گئی ہے۔ایک سینئر پولیس افسر نے بتایا کہ ڈوڈہ، کشتواڑ اور رام بن اضلاع میں یوم جمہوریہ سے قبل کسی بھی ناخوشگوار واقعے کو ناکام بنانے کے لیے سخت انتظامات کیے گئے ہیں۔انہوں نے کہا کہ جموں و کشمیر پولیس نے سرینگر جموں قومی شاہراہ اور دیگر لنک سڑکوں پر چیکنگ پوائنٹس قائم کیے ہیں تاکہ بے ترتیب چیکنگ اور مشتبہ افراد کی چوبیس گھنٹے تلاشی لی جاسکے۔ہائی وے ٹاؤن بانہال، رامسو، رام بن، چندرکوٹ اور بٹوت کے ناشری علاقے اور دیگر مقامات پر ڈوڈہ، کشتواڑ اور رام بن اضلاع کے داخلی اور خارجی راستوں سمیت مناسب پولیس اہلکاروں کو تعینات کرکے سیکورٹی کو بڑھا دیا گیا ہے۔ ضلع ہیڈکوارٹر ٹاؤن ڈوڈہ، کشتواڑ اور رام بن کے آس پاس کے دیہاتوں میں رات کی گشت بھی تیز کر دی گئی ہے۔قومی شاہراہ 44اور قومی شاہراہ 244پر سفر کرنے والے مسافروں کے شناختی کارڈز کی جانچ پڑتال کی جا رہی ہے اور خاص طور پر سری نگر جموں قومی شاہراہ پر قائم مختلف چیک پوائنٹس پر گاڑیوں کی چیکنگ کی جا رہی ہے۔سینئر سپرنٹنڈنٹ آف پولیس رامبن کلبیر سنگھ نے دعویٰ کیا کہ پولیس اور سیکورٹی ایجنسیاں چوکس ہیں اور حالات پر باقاعدگی سے نظر رکھے ہوئے ہیں۔
