عظمیٰ نیوز سروس
سرینگر// جموں و کشمیر کے ڈائریکٹر جنرل پولیس نلین پربھات نے پولیس کنٹرول روم کشمیر کے کانفرنس ہال میں آنے والے واقعات کے پیش نظر سیکورٹی جائزہ اجلاس کی صدارت کی۔میٹنگ میں سپیشل ڈی جی کوآرڈینیشن ایس جے ایم گیلانی، اے ڈی جی سی آر پی ایف راجیش کمار، اے ڈی جی پی آرمڈ جموں و کشمیر آنند جین، اے ڈی جی پی سی آئی ڈی نتیش کمار، انٹلی جنس اور یوٹی کے دیگر سیکورٹی اداروں کے سربراہوں نے شرکت کی۔ڈائرکٹر جنرل پولیس کو زونل انسپکٹرز جنرل اور مختلف ونگز کے سربراہان نے یونین ٹیریٹری میں سیکورٹی کی موجودہ صورتحال سے آگاہ کیا۔ انٹیلی جنس ونگ کے سینئر افسران نے اپنے جائزے پیش کئے اور ڈی جی پی کو متعلقہ پیش رفت سے آگاہ کیا۔ میٹنگ کے دوران، افسران نے حالیہ سیکورٹی پیش رفت کے ساتھ ساتھ موجودہ چیلنجزکا مقابلہ کرنے کے اقدامات پر تبادلہ خیال کیا۔ ڈی جی پی نے سیکورٹی پلانوں کا جائزہ لینے اور ان میں اضافہ کرنے کی ضرورت پر زور دیا اور تقریبات کے ہموار اور پرامن انعقاد کے لیے مثر انسداد بغاوت کی حکمت عملی وضع کرنے کی ضرورت پر زور دیا۔ڈی جی پی نے افسران کو ملک دشمن عناصر پر نگرانی بڑھانے اور اپنے اپنے علاقوں میں علاقے کا تسلط بڑھانے کی بھی ہدایت کی۔ انہوں نے کمزور اہداف کی سیکورٹی بڑھانے اور فول پروف سیکورٹی انتظامات کو یقینی بنانے کی ضرورت پر بھی زور دیا۔ ڈی جی پی جموں و کشمیر نے ضلعی سربراہوں کو سوشل میڈیا پلیٹ فارمز کی کڑی نگرانی کرنے کی بھی ہدایت دی تاکہ عوامی تحفظ اور نظم و نسق کو متاثر کرنے والی غلط معلومات پھیلانے کی کسی بھی کوشش کو روکا جا سکے۔میٹنگ پوری وادی میں امن و سلامتی کو برقرار رکھنے کے لیے سخت چوکسی، بہتر تال میل اور حفاظتی اقدامات کے موثر نفاذ کو یقینی بنانے کے عزم کے ساتھ اختتام پذیر ہوئی۔
