نئی دہلی// یوم آزادی پر کسی بھی طرح کی صورتحال سے نپٹنے کے لئے دہلی پولیس حفاظتی انتظامات کو چاک و چوبند کرکے اضافی احتیاط برت رہی ہے ۔اہم بازاروں اور مال، ریلوے اسٹیشنوں، بس اڈوں او ردیگر بھیڑ بھاڑ والے علاقوں میں دہلی پولیس نے چوکسی بڑھا دی ہے ۔ سینئر حکام دہشت گردی جیسی کسی بھی طرح کی سرگرمیوں کو روکنے کے لئے خودحالات کاجائزہ لے رہے ہیں۔دہلی ٹریفک پولیس نے ٹریفک کے تعلق سے سنیچر کو مشورہ جاری کیا ہے ۔ یہ مشورے 13 اگست کو ہونے والی یوم آزادی کی مشق اور پندرہ اگست کی یوم آزادی کی تقریب کے لئے خصوصی طورپر جاری کئے گئے ہیں۔یوم آزادی تقریب کی جگہ لال قلعہ اور اس کے آس پاس سخت نظر رکھی جارہی ہے اور علاقہ میں اضافی پولیس اور نیم فوجی دستوں کے جوانوں کو تعینات کیا گیا ہے ۔ اس کے ساتھ ہی پولیس دستہ اہم مقامات کا اچانک معائنہ کررہا ہے ۔ادھر پر کاس گنج میں بھڑکے تشدد کے بعد ایک بار پھر15 اگست (یوم آزادی) کو ترنگا یاترا نکالنے کی تیاری ہے۔ معاملے کی سنجیدگی کودیکھتے ہوئے کاس گنج کے ایس پی شیوہری مینا نے ڈی جی پی دفترکو خط بھیج کراضافی فورس کا مطالبہ کیا ہے۔ اس کے سبب خفیہ ایجنسیوں کو الرٹ جاری کردیا گیا ہے۔ایس پی کاس گنج شیوہری مینا نے بتایا کہ 15 اگست کو دوفریقوں کی طرف سے ضلع انتظامیہ سے ترنگا یاترا نکالنے کی اجازت مانگی گئی تھی۔ پولیس نے انتظامیہ سے اجازت نہیں دینے کی سفارش کی گئی ہے، جس سے شہر میں پہلے جیسا کوئی حادثہ نہ ہو۔غورطلب ہے کہ وشو ہندو پریشد اوراکھل بھارتیہ ودیارتھی پریشد کے کارکنان کے ذریعہ نکالی جارہی موٹرسائیکل ریلی پر پتھراو کے بعد تشدد بھڑک اٹھی تھی۔ اس کے بعد ہوئی آتشزدگی اور فائرنگ میں ایک لڑکا چندن کی موت ہوگئی جبکہ دو دیگر زخمی ہوگئے تھے۔یاد رہے15اگست کے دن ترنگا یاترا کے دوران کاس گنج میں بھڑکے تشدد میں مارے گئے چندن گپتا معاملے میں پولیس نے نامزد ملزمین کی فہرست جاری کی تھی، جس کے بعد اس معاملے میں 117 لوگوں کو گرفتار کیا گیا تھا۔ تشدد میں درج 5 ایف آئی آر کے تحت 36 لوگوں کو گرفتار کیا گیا تھا جبکہ 81 لوگوں کو دفعہ 144 کی خلاف ورزی میں گرفتار کیا گیا تھا۔ کاس گنج تشدد کے دوران شہر میں آتشزدگی کی 7 ایف آئی آر بھی درج کی گئی تھی۔
یوم آزادی کی آمد ، دہلی میں ہائی الرٹ
