یاتریوں اور سیاحوں کو کوئی خطرہ نہیں:گیلانی

سرینگر// حریت (گ) سید علی گیلانی  نے بھارتی الیکٹرانک میڈیا کے اس منفی پروپگنڈاکو سختی کے ساتھ مسترد کردیا ہے، جس کے ذریعے یہ باور کرانے کی کوشش کی جارہی ہے کہ یاتریوں کو کشمیریوں کی طرف سے خطرہ ہے اور وہ انہیں نقصان پہنچانا چاہتے ہیں۔ انہوں نے کہا کہ کشمیری قوم ایک مہذب اور مہمان نواز قوم ہے اور اس نے باہر سے آئے مہمانوں کی ہمیشہ عزت افزائی کی ہے۔ گیلانی نے کہا کہ بھارت کے جنونی فرقہ پرست کشمیریوں کی مبنی بر حق جدوجہد کو بدنام کرنے اور غلط رنگ دینے کے لیے ہندو مسلم مناقشے کے طور پیش کرانا چاہتے ہیں اور اس کی آڑ میں وہ ان مکروہ منصوبوں کو عملی جامہ پہنانا چاہتے ہیں۔ اس کام میں بھارت کا الیکٹرانک میڈیا ہر اول دستے کا رول ادا کررہا ہے اور وہ دن کے چوبیسویں گھنٹے کشمیریوں اور ان کی جدوجہد کے خلاف زہر اُگلتا رہتا ہے۔گیلانی  نے کہا کہ بھارت کا الیکٹرانک میڈیا زعفرانی برگیڈ کے ماؤتھ پیس کے طور پر کام کرتا ہے اور وہ اسی کی ہدایت پر عمل کرتا ہے۔جنونی فرقہ پرستوں نے ا صل میں کشمیر اور خاص طور سے جموں صوبے کے مسلمانوں کے خلاف ایک خطرناک منصوبہ بندی ترتیب دی ہے اور وہ اس ریاست میں فرقہ وارانہ فسادات کی آگ بھڑکانا چاہتے ہیں۔ اس مقصد کے لیے یاتریوں کو درپیش خطرے کا مفروضہ کھڑا کردیا گیا ہے اور اس کی خوب تشہیر کی جارہی ہے۔ گیلانی  نے یاتریوں اور سیاحوں کو مخاطب کیا کہ انہیں کشمیری عوام کی طرف سے کوئی خطرہ درپیش نہیں ہے۔ گیلانی  نے کہا کہ کشمیر آنے والے مہمانوں کو تنازعہ کشمیر کی حقیقت بھی جاننے کی کوشش کرنی چاہیے۔ یہ ایک سیاسی اور انسانی مسئلہ ہے اور اس کا دہشت گردی یا فرقہ واریت کے ساتھ کوئی لینا دینا نہیں ہے ۔