یواین آئی
جموں// جموں و کشمیر کے کٹھوعہ ضلع کے ہیرا نگر کے سنیال گائوں میں چھپے ملی ٹنٹوں کی تلاش کے لئے منگل کو تیسرے روز بھی آپریشن وسیع پیمانے پر جاری ہے ۔واضح رہے کہ ملی ٹنٹوں کی موجودگی کے بارے میں مصدقہ اطلاع پر کارروائی کرتے ہوئے سیکورٹی فورسز نے اتوار کو ہیر انگر کے سنیال علاقے کو محاصرے میں لے کر وسیع پیمانے پر تلاشی آپریشن شروع کر دیا تھا۔ذرائع نے بتایا کہ اس دوران وہاں چھپے ملی ٹنٹوں نے سیکورٹی فورسز پر اندھا دھند فائرنگ کی تھی جس کے نتیجے میں طرفین کے درمیان تصادم چھڑ گیا تھا جس کے بعد طرفین کے درمیان آمنا سامنا نہیں ہوا۔حکام نے بتایا کہ علاقے میں محصور ملی ٹینٹوں کی تلاش کے لیے این ایس جی اور پیرا کمانڈوز کو بھی تعینات کیا گیا ہے ۔انہوں نے کہا کہ جموں وکشمیر کے ڈی جی پی نالین پربھات خود اس آپریشن کی نگرانی کر رہے ہیں۔بتایا جاتا ہے کہ اتوار کے روز جنگل میں بالن اکٹھا کرنے گئی خواتین نے نرسری میں ملی ٹینٹوں کو دیکھا اور اس بارے میں فوج کو اطلاع دی۔ اطلاع موصول ہوتے ہی سیکورٹی فورسز نے علاقے کو محاصرے میں لے کر تلاشی آپریشن شروع کر دیا۔دفاعی ذرائع کے مطابق ہیرا نگر کے سنیال گاؤں میں موجود ملی ٹینٹوں کو ہلاک کرنے کے لیے تمام تر وسائل بروئے کار لائے جا رہے ہیں۔انہوں نے کہا کہ کھوجی کتوں اور ڈرون کیمروں کی مدد سے جنگلی علاقے کو کھنگالا جا رہا ہے تاکہ ملی ٹینٹوں کو جلد از جلد انجام تک پہنچایا جا سکے ۔ ان کا مزید کہنا تھا کہ پیرا کمانڈوز کے ساتھ ساتھ این ایس جی کی بھی خدمات حاصل کی گئی ہیں۔فوج کی رائزنگ سٹار کور نے پیر کو ‘ایکس’ پر ایک پوسٹ میں کہا: ‘ 23 مارچ کو ہیرا نگر کے سنیال میں جموں و کشمیر پولیس اور بھارتی فوج کی رائزنگ سٹار کور کے مشترکہ آپریشن کے نتیجے میں جنگی سٹروز بر آمد کئے گئے جبکہ علاقے میں آپریشن ہنوز جاری ہے ‘۔ انہوں نے ‘ایک’ ہینڈل پر بر آمد شدہ جنگی مواد کی تصویر بھی پوسٹ کی ہے ۔ذرائع نے بتایا کہ سنیال گاؤں کے ساتھ ساتھ آس پاس کے علاقوں میں بھی سیکیورٹی فورسز کی تعیناتی عمل میں لائی گئی ہے اور ملی ٹنٹوں کے فرار ہونے کے تمام راستوں کو سیل کر دیا گیا ہے ۔
Package
