نئی دہلی// مشرقی لداخ میں پینگانگ جھیل کے قریب گذشتہ ہفتے کے واقعات کے بعد سے ہندوستان اور چینی فوجی حکام کے مابین مسائل کے حل کے لئے بدھ کومسلسل تیسرے دن میٹنگ جاری ہے اس سے قبل پیر اور منگل کو ، دونوں فریقوں کے درمیان بریگیڈ کمانڈر کی سطح کے مذاکرات کے بعد ، آج صبح دس بجے مذاکرات کا تیسرا دور پھر شروع ہوا۔
چین کی درخواست پر ، چشول مولڈو میں ہونے والی بات چیت میں پینگانگ جھیل کے جنوبی کنارے پرگذشتہ ہفتے ہوئے واقعہ سے متعلق مسئلوں پر تبادلہ خیال کیا جائے گا۔ اس بات چیت کا مقصد تازہ ترین واقعات کے بعد ایک بار پھر سرحدی کشیدگی پر برقرار تناو¿ کو کم کرنا اور حالات کو معمول پر لانا ہے۔
ذرائع کے مطابق فریقوں کے درمیان پہلے دور میں دو مذاکرات میں کسی مسئلے پر اتفاق نہیں ہوسکا۔
اس دوران تازہ واقعات کے پیش نظر وزارت داخلہ نے چین ،نیپال اور بھوٹان سے متصل سرحدوں پر تعینات سلامتی دستوں کو پوری طرح چوکس رہنے کا حکم دیا ہے۔ہندوستان تبت سرحد پولیس کو اتراکھنڈ،اروناچل پردیش،ہماچل پردیش، لداخ اور سکم میں جبکہ بارڈر فورس کو نیپال اور بھوٹان سرحد پر سخت نگرانی رکھنے کو کہا گیا ہے۔
وزیر دفاع راج ناتھ سنگھ نے منگل کو قومی سلامتی مشیر،چیف آف ڈفینس اسٹاف جنرل بیپن راوت ،فوج کے سربراہ جنرل منوج مکند نرونے اور ڈائرکٹر جنرل ملٹری آپریشنز اور دیگر اعلی عہدے داروں کے ساتھ اعلی سطحی میٹنگ میں حالات کا جائزہ لیا اور مستقبل کے منصوبے پر تبادلہ خیال کیا۔
