یو این آئی
دہلی/لوکیش راہول کی ناقابل شکست نصف سنچری کی بدولت ہندوستان نے دہلی میں کھیلے گئے دوسرے اور آخری ٹیسٹ میچ میں ویسٹ انڈیز کو 7 وکٹوں سے شکست دے کر دو میچوں کی سیریز 0-2 سے کلین سویپ کرلی۔ہندوستان نے میچ کے پانچویں اور آخری روز درکار 58 رنز بناکر میچ 7وکٹوں سے جیت لیا۔ کلدیپ یادیو کو عمدہ بائولنگ پر میچ کا بہترین کھلاڑی قرار دیا گیا جبکہ رویندر جڈیجہ کو سیریز کا بہترین کھلاڑی قرار دیا گیا۔ منگل کو ارون جیٹلی سٹیڈیم، دہلی میں کھیلے گئے دوسرے ٹیسٹ میچ کے پانچویں اور آخری روزمیزبان ہندوستانی ٹیم کو میچ میں کامیابی کے لئے 58 رنز درکار تھے جبکہ ویسٹ انڈیز کو نو وکٹیں درکار تھیں۔ چوتھے روز کے اختتام پر ویسٹ انڈیز ٹیم کی جانب سے ملنے والے 121 رنز کے تعاقب میں ہندوستانی ٹیم نے اپنی دوسری اننگز میں 1 وکٹ کے نقصان پر 63 رنز بنالئے تھے ۔ یشسوی جیسوال 8 رنز بناکر آؤٹ ہوگئے تھے ، پانچویں اور آخری روز ہندوستانی ٹیم نے اپنی دوسری ادھوری اننگز 63 رنز ایک کھلاڑی آئوٹ پر دوبارہ شروع کی تو لوکیش راہول 25 اور سائی سدرشن 30 رنز کے ساتھ ناٹ آؤٹ تھے ۔ سائی سدرشن اپنے گزشتہ روز کے انفرادی سکور میں 9 رنز کا اضافہ کرنے کے بعد 39 رنز بناکر روسٹن چیس کی گیند پر شائی ہوپ کے ہاتھوں کیچ آئوٹ ہوگئے۔ کپتان شبمن گل تیسرے آئوٹ ہونے والے کھلاڑی تھے جو 13 رنز بنانے کے بعد روسٹن چیس کی گیند پر جسٹن گریوز کے ہاتھوں کیچ آئوٹ ہوگئے ۔لوکیش راہول 58 اور دھرو جریل 6 رنز کے ساتھ ناٹ آئوٹ رہے ۔یوں ہندوستان نے ویسٹ انڈیز ٹیم کو نہ صرف میچ میں 7 وکٹوں سے شکست دے دی بلکہ دو میچوں کی سیریز بھی 0-2 سے کلین سویپ کرلی۔ کپتان رسٹن چیس نے دو جبکہ جومل واریکن نے ایک کھلاڑی کو آئوٹ کیا۔سیریز میں کلین سویپ کے بعد اب ہندوستانی ٹیم آسٹریلیا کا دورہ کرے گی۔
