ہندوستان محصولات کم کرے | امریکی وزیر تجارت نے ٹرمپ کا نقطہ نظر دہرایا

عظمیٰ نیوز سروس

نئی دہلی//امریکی کامرس سکریٹری ہاورڈ لیٹنک نے ہندوستان امریکہ تعلقات اور محصولات کے بارے میں ٹرمپ کے نقطہ نظر کو دہرایا۔ انہوں نے کہا کہ ہندوستان ان ممالک میں شامل ہے جو امریکی اشیا پر سب سے زیادہ محصولات عائد کرتے ہیں۔ لیٹنک نے یہ بھی کہا کہ ہندوستان کو ٹیرف کم کرنا ہوں گے تاکہ امریکہ ہندوستانی منڈیوں میں داخل ہوسکے۔ انہوں نے کہا کہ اس سے دونوں ممالک کے درمیان یکساں تجارت ہو گی۔ انہوں نے کہا کہ ہندوستان کو بھی اس ماڈل سے نکلنے کی ضرورت ہے جس پر وہ عمل پیرا ہے۔ہاورڈ لیٹنک نے انڈیا ٹوڈے کے ایک پروگرام میں کہا’’ہم صرف ہندوستان اور امریکہ کے درمیان دو طرفہ بات چیت پر توجہ مرکوز کرنا چاہتے ہیں۔” انہوں نے واضح کیا کہ صرف بوربن وہسکی اور ہارلے ڈیوڈسن بائیکس پر ٹیرف کم کرنے سے کام نہیں چلے گا، بلکہ ہندوستان کو بڑے پیمانے پر ٹیرف کم کرنے کے بارے میں سوچنا ہوگا۔ لیٹنک نے مشورہ دیا کہ ہندوستان کو زراعت جیسے حساس شعبوں کے لیے اپنی منڈیاں کھولنی ہوں گی۔ ہندوستان امریکہ کو اپنی مارکیٹ میں آنے کی اجازت دے۔ انہوں نے اسمارٹ طریقے سے کاروبار کرنے کی بات کی تاکہ چھوٹے کسانوں کو فائدہ ہو سکے۔ہاورڈ لیٹنک نے تجویز پیش کی کہ دونوں ممالک کے مفادات کو متوازن کرنے کے لیے ایک حد تک ٹیرف لگانے کا معاہدہ کیا جا سکتا ہے۔ ان کا کہنا تھا کہ “ہندوستان شروع سے ہی امریکی اشیا پر ٹیرف لگاتا رہا ہے، جب کہ امریکا پہلے ٹیرف نہیں لگاتا تھا۔ اب ٹرمپ باہمی محصولات لگا کر اپنی پالیسی بدل رہے ہیں۔ اب جو بھی ملک امریکہ کے ساتھ ایسا سلوک کرے گا، ہم بھی اس کے ساتھ ویسا ہی سلوک کریں گے‘‘۔ڈونالڈ ٹرمپ نے بدھ یعنی5مارچ کو اس بات کا اعادہ کیا کہ 2اپریل سے ان تمام ممالک پر باہمی محصولات عائد کیے جائیں گے جو امریکہ سے زیادہ ٹیکس وصول کرتے ہیں۔ امریکی صدر ڈونالڈ ٹرمپ اور ہندوستانی وزیر اعظم نریندر مودی کے درمیان گزشتہ ماہ ہونے والی ملاقات کے بعد دونوں ممالک نے ٹیرف کے تنازعات کو حل کرنے اور 2025تک تجارتی معاہدے کے پہلے مرحلے پر کام کرنے پر اتفاق کیا۔ اس کا مقصد 2030تک دو طرفہ تجارت میں 500بلین ڈالر حاصل کرنا ہے۔