سمت بھارگو+حسین محتشم
راجوری+پونچھ//لوک سبھا میں قائد حزب اختلاف راہول گاندھی نے ہفتہ کو ضلع پونچھ کا دورہ کیا، جہاں انہوں نے حالیہ سرحد پار گولہ باری اور جنگ جیسے حالات سے متاثرہ علاقوں کا جائزہ لیا اور متاثرین سے ملاقات کی۔راہل گاندھی ہفتے کی صبح جموں پہنچے، جہاں جموں و کشمیر حکومت کے کابینہ وزیر جاوید رانا نے ان کا استقبال کیا اور بعد ازاں انہیں پونچھ لے گئے۔ پونچھ پہنچنے پر ریاستی صدر طارق حمیدقرہ کی قیادت میں کانگریس رہنماؤں نے ان کا پرتپاک خیرمقدم کیا۔راہل گاندھی نے ان خاندانوں سے ملاقات کی جنہوں نے حالیہ پاکستانی گولہ باری میں اپنے پیارے کھو دئیے۔ انہوں نے جاں بحق افراد کے اہل خانہ سے تعزیت کا اظہار کرتے ہوئے کہا کہ ’پورا ملک آپ کے ساتھ کھڑا ہے، یہ دکھ صرف آپ کا نہیں بلکہ پورے بھارت کا ہے‘‘۔انہوں نے ان مقامات کا بھی دورہ کیا جہاں شدید مالی نقصان ہوا ہے، خاص طور پر وہ رہائش گاہیں جو مکمل طور پر تباہ ہو چکی ہیں۔دورے کے دوران راہل گاندھی نے گیتا مندر پونچھ، گردوارہ سنگھ سبھا پونچھ اور جامعہ ضیاء العلوم پونچھ میں بھی حاضری دی اور خطے میں امن و سکون کے لئے دعا کی۔ سنگھ سبھا گرد وارے میں انہوں نے اس دوران پاکستانی گولہ باری سے جاں بحق ہونے والے 50سالہ سابق فوجی امر جیت سنگھ کے اہل خانہ کے ساتھ بھی ملاقات کی اور ان کے ساتھ ہمدردی کا اظہار کیا۔راہل گاندھی نے سوگوار کنبے کے ساتھ تعزیت کی اور انہیں ہر ممکن تعاون کرنے کی یقین دہانی کی۔بعد ازاں انہوں نے کرسچن سکول پونچھ کا دورہ بھی کیا، جہاں حالیہ گولہ باری میں تین طلباء جان بحق ہو گئے تھے۔ سکول عملے اور طلباء سے بات چیت کے دوران، راہل گاندھی نے ان کے دکھ کو قریب سے محسوس کیا۔ طلباء نے اپنے ساتھیوں کے کھو جانے کے غم کو آنکھوں میں آنسو لئے بیان کیا۔ گردوارہ سنگھ سبھا پونچھ میں مقامی لوگوں سے بات چیت کرتے ہوئے راہل گاندھی نے کہاکہ ’’میرے دورے کے دو مقصد ہیں؛ ایک تو زمینی صورتحال اور نقصانات کا جائزہ لینا اور دوسرا پونچھ کے لوگوں کے مسائل کو ملک کی سطح پر اٹھانا‘‘۔انہوں نے مزید کہا کہ اس دورے کے دوران پونچھ کے عوام نے کئی اہم مسائل ان کے سامنے رکھے ہیں، اور وہ ان مسائل کو اجاگر کرنے کے لئے براہ راست وزیر اعظم کو خط لکھیں گے اور پارلیمنٹ میں بھی آواز بلند کریں گے۔راہل گاندھی کے اس بیان سے متاثرہ عوام میں امید کی کرن پیدا ہوئی ہے کہ ان کے مسائل ملک کے اعلیٰ ایوانوں تک پہنچیں گے اور عملی اقدامات اٹھائے جائیں گے۔ گاندھی نے کہا’’آج میں پونچھ میں پاکستانی گولہ باری میں اپنی جانیں گنوانے والوں کے کنبوں سے ملا۔ ٹوٹے ہوئے گھر، بکھرا ہوا سامان، نم آنکھیں اور ہر کونے میں اپنے پیاروں کو کھونے کی دردناک کہانیاں، پونچھ خطے کے یہ محب وطن کنبے ہر بار جنگ کا سب سے بڑا بوجھ ہمت اور وقار کے ساتھ اٹھاتے ہیں۔ ان کی ہمت کو سلام‘‘۔انہوں نے کہا کہ وہ متاثرہ کنبوں کے ساتھ مضبوطی سے کھڑے ہیں اور ان کے مطالبات اور مسائل کو قومی سطح پر ضرور اٹھائیں گے ۔ انہوں نے کہا کہ یہ مرکز کے زیر انتظام علاقوں کے لوگوں کے لئے بحران کا وقت ہے اور ہم اس میں ان کے ساتھ کندھے سے کندھا ملا کر کھڑے ہیں۔ راہل گاندھی نے پونچھ میں پاکستانی گولہ باری سے ہونے والی تباہی کو المیہ قرار دیتے ہوئے کہا کہ گولہ باری سے کئی لوگوں کی جانیں گئی ہیں اور بڑے پیمانے پر نقصان ہوا ہے۔انہوں نے کہا’’لوگوں نے مجھے دو تین چیزیں قومی سطح پر اٹھانے کو کہا ہے جو میں کروں گا‘‘۔
