غور طلب
سید مصطفی احمد
ہمارے معاشرے کے گوشہ گوشہ میں برائیاں ہمیں منہ چڑھاتی ہیں۔ جہیز کی وجہ سے ہونے والی اموات، منشیات کی لت، گھریلو تشدد، بچیوں کو پیٹ میں ہی ختم کرنا، نومولود بچیوں کا قتل، بدعنوانی، صنفی ناانصافی، نسل پرستی، انسانوں کی خرید و فروخت، ذات پات کا امتیاز، غربت، غذائی اشیاء کی ملاوٹ، ذخیرہ اندوزی وغیرہ جیسی برائیاں اپنے سر اٹھا چکی ہیں۔ یہ سب برائیاں سماج پر منفی اثر ڈالتی ہیں۔ تاہم کچھ جرائم اور برائیاں دوسری کے مقابلے میں زیادہ سنگین ہیں۔ جیسے بچیوں کو زندہ دفن کرنا یا رحم مادر میں قتل کرنا انسانیت اور فطرت کے خلاف جرم ہے۔ کسی کو بھی ایک جیتے جاگتے وجود کے قتل کا اختیار نہیں دیا جا سکتا۔ یہ نسلوں کے وجود پر براہِ راست حملہ ہے۔ لیکن یہ رویہ چند دنوں میں پیدا نہیں ہوا بلکہ صدیوں کی ذہنی پسماندگی نے اس کو پروان چڑھایا ہے۔ یہاں میں اس کے چند اسباب پر روشنی ڈالنا چاہوں گا۔
پہلا سبب مادیت پرستی ہے۔ مادیت پرستی ایک ایسا راستہ ہے جس پر بہت احتیاط سے چلنا چاہیے۔ اس میں تخلیق کرنے اور تباہ کرنے دونوں کی صلاحیت ہے۔ مگر تجربہ بتاتا ہے کہ انسانوں کی اکثریت اس کے تباہ کن پہلو کا شکار ہوئی ہے۔ لوگ اس کی پرستش کرتے ہیں، اسے جمع کرتے ہیں گویا یہ ہمیشہ ان کے ساتھ رہے گی۔ انسانیت اس دوڑ میں ٹھوکریں کھاتی ہے۔ وسطی ایشیا، میانمار، شام اور افریقہ کی تباہی اس حقیقت کو ظاہر کرتی ہے کہ جب اشرف المخلوقات اپنی حدود سے تجاوز کرتا ہے تو پوری دنیا کی تقدیر بربادی بن جاتی ہے۔ یہ بربادی پھر دیگر جرائم کو جنم دیتی ہے۔ منشیات کی لت، جنسی رسوائیاں، انسانی اسمگلنگ وغیرہ ان خطوں میں پیدا ہوتی ہیں
کیونکہ جب حکومت ناکام ہو جائے تو طاقتور کو ہی حق ملتا ہے۔ سماج میں اخلاقیات کی جگہ بدمعاش عناصر لیتے ہیں اور نتیجہ یہ نکلتا ہے کہ معاشرہ اخلاقی پستی کی ایسی کھائی میں گر جاتا ہے جہاں سے نکلنا تقریباً ناممکن ہو جاتا ہے۔ دوسرا سبب یہ ہے کہ ہمارے اندر سائنسی شعور کی کمی ہے۔ ہر مذہبی اور غیر مذہبی متن اس بات پر زور دیتا ہے کہ انسان کائنات کی تخلیق پر غور کرے۔ کائنات کے کامل نظام کو دیکھ کر کوئی بھی سمجھ سکتا ہے کہ ایک حکیم و دانا خالق موجود ہے۔ ہماری آنکھوں کے سامنے موجود تنوع، خواہ جانداروں میں ہو یا بے جان اشیاء میں، ہماری عقل کو حیران کرتا ہے اور خالق کی حقیقت کا غماز ہے۔ فطری مظاہر یہ یقین دلاتے ہیں کہ یہ سب کچھ ہزاروں اسبابِ طبیعیہ کی مرہونِ منت ہیں۔ اس میں انسان کا کوئی عمل دخل نہیں۔ یہ سوچ پوری انسانیت کے لیے ایک قیمتی سرمایہ ہے۔ اس کے برعکس وہ ذہن جو اوہام پرست ہو، کبھی حقیقت کا سامنا نہیں کرتا۔ وہ قوسِ قزح کو پوجتا ہے، بڑے درخت محض قد کی وجہ سے مقدس مانے جاتے ہیں، جانور جنہیں انسان کی خدمت کے لیے بنایا گیا ہے ان کی پرستش کی جاتی ہے۔ حقیقت یہ ہے کہ خدا اس وقت خوش ہوتا ہے جب ہم ایک دوسرے کی رنگ، نسل اور مذہب کی پرواہ کیے بغیر خدمت کرتے ہیں۔ لیکن جب ہم انسانوں کی قربانی دے کر دیوتاؤں کو خوش کرنے کی کوشش کرتے ہیں تو اس کا مطلب یہ ہوتا ہے کہ ہم جانوروں سے بھی زیادہ درندہ صفت ہیں۔ خدا کو قتل و غارت سے نفرت ہے لیکن ہم انسانوں کو منحوس قرار دے کر قتل کرتے ہیں۔ یہ سوچ نہایت خطرناک ہے اور اس کے نتائج تلخ ہیں۔ تیسرا سبب کمزور حکومت ہے۔ وہ اکثر مجرموں کے ساتھ ملی بھگت رکھتی ہے۔ اگر وہ سنجیدہ ہوں تو جرائم اس قدر بڑے پیمانے پر نہ ہوں۔ مجرموں سے آہنی ہاتھوں سے نمٹا جانا چاہیے۔ ان کے لیے کوئی نرم رویہ نہیں ہونا چاہیے۔ اکثر اوقات مجرم کئی وجوہات کی بنا پر چھوٹ جاتے ہیں۔ سخت قوانین ہی جرائم کی افزائش کو روک سکتے ہیں۔ سیاست میں حکمران کو نرمی اور سختی دونوں کی علامت ہونا چاہیے۔ حالات کی روشنی میں حکمرانی کی نوعیت بدلتی رہتی ہے۔ لیکن موجودہ دنیا میں حکمران کا سخت رخ زیادہ ضروری ہے۔ زیادہ تر لوگ محبت کی زبان نہیں سمجھتے، لہٰذا ان کو راہِ راست پر لانے کے لیے لاٹھی کا استعمال بھی ناگزیر ہے۔ گناہگار کو عبرت ناک سزا ملنی چاہیے تاکہ دوسروں کے لیے سبق ہو اور برائیوں کا گراف کچھ نیچے آ سکے۔ چوتھا سبب صنفی امتیاز ہے۔ لڑکی اور لڑکے کو سطحی بنیادوں پر پرکھا جاتا ہے۔ لڑکے کو فخر کا موجب سمجھا جاتا ہے جبکہ لڑکی کو باعثِ شرم۔ یہی سوچ لڑکیوں کے زندہ رہنے میں روڑے اٹکاتی ہے۔ لوگ کوشش کرتے ہیں کہ انہیں ختم کر دیا جائے تاکہ نام نہاد شرمندگی ہمیشہ کے لیے دور ہو۔ اس سوچ نے بچیوں کے قتل، گھریلو تشدد اور جنسی امتیاز کو جنم دیا ہے۔ ہمارا سماجی ڈھانچہ لڑکے اور لڑکی کے درمیان فرق قائم کرتا ہے۔ لڑکی کو شک کی نظر سے دیکھا جاتا ہے۔ اکثر مواقع پر لڑکے باآسانی بچ جاتے ہیں، لیکن لڑکیاں معمولی بات پر ہراسانیوں کا شکار ہو جاتی ہیں۔ یہ ناانصافی گھروں سے لے کر بازاروں تک ہر جگہ پائی جاتی ہے۔ ایسی فضا سکون نہیں بلکہ صرف اندوہ و مایوسی پیدا کرتی ہے۔ کوئی دن ایسا نہیں گزرتا جب کوئی لڑکی ریپ، چھیڑ چھاڑ یا بدسلوکی کا شکار نہ ہوتی ہو۔ یہ ایک طویل داستانِ الم ہے جس کا کوئی انجام دکھائی نہیں دیتا۔ موجودہ منظر نامہ مستقبل کا عکس دکھاتا ہے۔ جب حال ہی تاریک ہو اور کوئی عملی اقدام نہ کیا جا رہا ہو تو مستقبل اس سے زیادہ تاریک ہی ہوگا۔ ہم اپنے آپ کو جدید کہتے ہیں لیکن اب بھی قدامت پرستی میں جیتے ہیں۔ ہم نے ابھی تک تخلیقِ انسان کی حقیقت کو سمجھا نہیں۔ اگر سمجھا ہوتا تو اپنی راہیں درست کر لیتے۔ اور اگر کوئی سمجھ بھی لے تو دوسروں کی پیروی کرتا ہے اور سماج نیک انسانوں سے خالی ہو جاتا ہے، جو مسائل کو روک سکیں۔ جرائم پر کسی نہ کسی سطح پر روک ہونی چاہیے۔ مجموعی طور پر انسانیت ذلیل ہو رہی ہے۔ آئیں ہم عہد کریں کہ ان برائیوں کے پھیلاؤ کو روکنے کی کوشش کریں۔ اگر ہم انفرادی سطح سے آغاز کریں تو یہ کوشش بارآور ثابت ہوگی۔
[email protected]
