نئی دہلی// وزیر اعظم نریندر مودی نے آج وگیان بھون میں کنسٹرکشن ٹیکنالوجی انڈیا ایوینٹ کی تقریب سے خطاب کرتے ہوئے مرکزی حکومت کی اس بات کو یقینی بنانے کی عہد بندی پر زور دیا کہ ہر ایک خاندان کا ایک مکان کا خواب حقیقت بنے گا۔وزیر اعظم نے کہا کہ گلوبل ہاؤسنگ ٹیکنالوجی چیلنج کی ضرورت ہندوستان میں تیزی سے ہونے والی شہرکاری کی روشنی میں محسوس کی گئی۔ انھوں نے کہا کہ پی ایم آواس یوجنا، ہردیے (ایچ آر آئی ڈی اے وائی) اور امرت (اے ایم آر یو ٹی) سمیت کئی اسکیموں کے عناصر مکانات کے شعبے کی کایا پلٹ کرنے کے لیے تیار کئے گئے ہیں۔ انھوں نے کہا کہ مختلف جغرافیائی صورت حال کے سلسلے میں ٹیکنالوجی اختیار کرنا بھی ایک چیلنج ہے ۔وزیر اعظم نے کہا کہ سستے مکانات، ریئل اسٹیٹ کے شعبے ، ہنرمندی کی ترقی اور مکانات کی ٹیکنالوجی پر بہت زیادہ زور دیا جاچکا ہے ۔وزیر اعظم نے کہا کہ اُن کا خواب ہے کہ ہر ایک ہندوستانی کے پاس 2022 تک ایک مناسب مکان ہو اور اُن کے دور اقتدار میں 1.3 کروڑ مکانات کی تعمیر کی جاچکی ہے ۔ انھوں نے سبھی سے اپیل کی کہ وہ صلاحیتوں میں اضافے اور غریب کی مدد کرنے کے لیے مل جل کر کام کریں۔وزیر اعظم نے کہا کہ حکومت ٹیکس اور دیگر اقدامات کے ذریعے لوگوں کے لیے مکانات کی خریداری کو بھی آسان بنا رہی ہے ۔ انھوں نے کہا کہ ریئل اسٹیٹ (ریگولیشن اینڈ ڈیولپمنٹ) ایکٹ (آر ای آر اے )نے ڈیولپرس میں صارفین کے اعتماد کو بہتربنایا ہے اور اس سے ریئل اسٹیٹ شعبے میں شفافیت آئی ہے ۔ انھوں نے کہا کہ خصوصی طور پر دیہی علاقوں میں ہنرمند انسانی وسائل کا ایک بڑا پول تیار کیا گیا ہے ۔ انھوں نے کہا کہ تعمیرات کے شعبے میں اب آفات کو برداشت کرنے کی صلاحیت، بجلی کی بچت اور مقامی اختراع پر زیادہ توجہ مرکوز کی جارہی ہے ۔وزیر اعظم نے کہا کہ گلوبل ہاؤسنگ ٹیکنالوجی چیلنج ایک ایسا پلیٹ فارم ہے جو بین الاقوامی معیارات کے مطابق ہندوستانی تعمیرات کے ایکو سسٹم کو بہتر بنانے میں مدد کرسکتا ہے ۔ انھوں نے اعلان کیا کہ اپریل 2019 سے مارچ 2020 تک کی مدت کو کنسٹرکشن ٹیکنالوجی سال کے طور پر منایا جائے گا۔۔
ابھی نندن کا مطلب بدل گیا :مودی
نئی دہلی//وزیر اعظم نریندر مودی نے ہندوستان اور پاکستان کے حالیہ واقعات کا ذکر کئے بغیر کہا کہ ملک میں ڈکشنری کے الفاظ کے معنی بدل دینے کی طاقت ہے اور اب ‘ابھینندن’ کا معنی بدل گیا ہے ۔مسٹر مودی نے یہاں کنسٹرکشن ٹکنالوجی انڈیا2019کانفرنس کو خطاب کرتے ہوئے کہا کہ ونگ کمانڈر ابھینندن ورتمان کی بہادری پر فخر ہے ۔ انہوں نے کہا کہ پہلے ابھینندن کا مطلب ‘کانگریچولیشن’ ہوتا تھا اب ابھینند ن کا معنی بدل گیا ہے ۔ یہ طاقت اس ملک میں ہے ۔انہوں نے کہا کہ ہندوستان کو ایک بہادر ملک کے طور پر آگے بڑھنا ہے ۔ اب ہندوستان جو بھی کرے گا اسے دنیا غور سے دیکھے گی۔ انہوں نے کہا کہ تکنیک کو سرحدوں میں قید نہیں کیا جاسکتا ۔ اپنے خوابوں کو پورا کرنے کے لئے ہم منظم انداز میں آگے بڑھنا ہے ۔یو این آئی
