عظمیٰ نیوز سروس
سرینگر// اپنی پارٹی صدر الطاف بخاری نے کہاہے کہ نیشنل کانفرنس اور پی ڈی پی جیسی پارٹیوں کو جڑ سے اکھاڑنا ہمارے لئے جہاد ہے۔ان کا ساتھ ہی کہنا تھا ‘ہمارے لئے انتخابات میں ہارنا یا جیتنا اہم نہیں ہے بلکہ ان جماعتوں کو باہر کرنا اہم بات ہے‘۔موصوف صدر نے ان باتوں کا اظہار ہفتے کے روز یہاں نامہ نگاروں کے ساتھ بات کرنے کے دوران کیا۔الطاف بخاری نے کہا کہ لوگوں کی خدمت کرنا اور سچ بولنا ہمارا ایجنڈا ہے۔انہوں نے کہا: ‘سچ کہنا ہمارا ایجنڈا ہے جب 20 کروڑ مسلمان اس ملک کے ساتھ خوش رہ سکتے ہیں تو ہم کیوں نہیں رہ سکتے اور سچائی یہ ہے کہ ہم ہندوستان کا حصہ ہیں اور ہمارے بھی وہی حقوق ہیں جو یہاں 130 کروڑ لوگوں کے ہیں’۔ان کا کہنا تھا ‘اپنی پارٹی نوجوانوں کو با قار زندگی دلانے کے لئے لڑے گی’۔موصوف صدر نے کہا کہ جن لیڈروں کا نعرہ سیلف رول، اٹانومی تھا ان کو بھی پکڑا جانا چاہئے۔انہوں نے کہا کہ اپنی پارٹی نیشنل کانفرنس اور پی ڈی پی سے چھٹکارا چاہتی ہے بلکہ بی جے پی نے بھی ہمارے لئے کچھ بھی نہیں کیا۔ان کا دعویٰ تھا کہ جموں وکشمیر میں اگلی حکومت اپنی پارٹی کی ہوگی۔ بخاری نے کہا کہ سال 2019 کے بعد جموں وکشمیر کے لوگوں نے امن کا ہاتھ پکڑا ہے۔انہوں نے مزید کہا، ’’پچھلی تین دہائیوں کے دوران، ان جماعتوں نے عوام کو مصیبتوں سے دوچار یا۔ ایک جماعت نے ٹاسک فورس کو عوام پر سوار کیا اور دوسری جماعت نے ہمارے نوجوانوں کے خلاف پیلٹ گن کا استعمال کیا۔ ان جماعتوں کے گمراہ کْن سیاسی بیانیہ کے نتیجے میں ہمارے لاکھوں نوجوان یا تو قبرستانوں میں دفن ہوگئے یا پھر جیلوں کی زینت بن گئے۔‘‘ بخاری نے لوگوں پر زور دیا کہ وہ ان جماعتوں کے فریب کا مزید شکار نہ بنیں بلکہ اْنہیں مسترد کریں۔
