عظمیٰ نیوزسروس
جموں//جموں و کشمیراور لداخ ہائی کورٹ کے جموں وِنگ میںچیف جسٹس کے کورٹ روم میں ایک فُل کورٹ ریفرنس منعقد ہوا جس میں ممتاز قانونی شخصیات، سینئر وکلأ اشوک وِجے گپتا اور پریم سروپ دتہ، ایڈوکیٹ رمیش چندر اروڑہ اور وِنود کمار بخشی کے اِنتقال پر گہرے دُکھ کا اِظہار کیا گیا۔چیف جسٹس، جسٹس ارون پلی نے تعزیتی خطاب میں مرحومین کی قانونی خدمات کو خراجِ عقیدت پیش کرتے ہوئے کہا کہ ان کی قانون سے وابستگی، محنت اور عدلیہ کے لئے لگن نے قانونی کمیونٹی پر گہرے اورانمٹ نقوش چھوڑے ہیں۔ چیف جسٹس اور ہائی کورٹ کے دیگر ججوں نے مرحومین کی اَرواح کے دائمی سکون اور لواحقین کے سوگوار اَفراد کو یہ ناقابل تلافی نقصان برداشت کرنے کی ہمت کے لئے دعا کی۔ اِس موقعہ پر سینئر ایڈیشنل ایڈووکیٹ جنرل اور صدرجموں ہائی کورٹ بار ایسوسی ایشن نے بھی تعزیتی خطابات میں مرحوم سینئر ایڈووکیٹس اشوک وِجے گپتا اور پریم سروپ دتہ، رمیش چندر اروڑا اور وِنود کمار بخشی کو خراجِ عقیدت پیش کیا۔ اُنہوں نے کہا کہ مرحوم وکلأنے عدل و اِنصاف کی خدمت دیانتداری، اخلاص اور خلوص نیت سے کی۔ ان کا قانونی علم اور عوام کے حقوق کے لئے عزم ہمیشہ یاد رکھا جائے گا۔سینئر ایڈیشنل ایڈووکیٹ جنرل مونیکا کوہلی نے ریاست، سرکاری وکلأ اور بار کی جانب سے تعزیت پیش کی اور مرحومین کی اَرواح کے دائمی سکون اور سوگوار کنبوں کو یہ صدمہ عظیم برداشت کرنے کی ہمت کے لئے دعا کی۔صدربار ایسوسی ایشن جموں نرمل کوتوال نے بھی اپنی اور بار کے تمام اراکین کی طرف سے اِظہارِ تعزیت کی اور کہا کہ ِان وکلأ کے اِنتقال سے نہ صرف تجربہ کار قانونی ماہرین کا نقصان ہوا بلکہ نوجوان وکلأکے لئے رہنمائی کرنے والے چراغ بھی بجھ گئے۔ ان کی کمی عدالتوں اور قانونی کمیونٹی میں شدت سے محسوس کی جائے گی۔جموں وِنگ میں ججوں اور وکلأنے فُل کورٹ ریفرنس میں ذاتی طور پر شرکت کی جبکہ سری نگربنچ کے ججوں اور وکلأ نے بذریعہ ورچیول موڈ تقریب میں حصہ لیا۔ریفرنس کے اِختتام پر مرحومین کی ارواح کے احترام میں ایک منٹ کی خاموشی اِختیار کی گئی اور عدالت کا کام باقی دِن کے لئے معطل رہا۔ ریفرنس کی کارروائی کے فرائض رجسٹرار جنرل ( قائم مقام) مہندر کمار شرما نے انجام دی۔
