گیلانی خانہ نظر بندیا بغیر اعلان عمر قید

 سرینگر// حریت (گ)چیرمین سید علی گیلانی مسلسل اپنے گھر میں نظربند ہیں اور وہ معمول کے مطابق کل بھی نماز جمعہ جیسے دینی فریضے کی ادائیگی سے محروم کردئے گئے۔ حریت ترجمان نے گیلانی کے تئیں حکومتی پالیسی کو انسانی اور آئینی قدروں کے منافی قرار دیتے ہوئے اس کی شدید الفاظ میں مذمت کی۔ انہوں نے کہا کہ گیلانی کو بغیر اعلان کے عُمر قید کی سزا کاٹ رہے ہیں اور ابھی تک ایسے کوئی آثار دکھائی نہیں دیتے کہ اُن کی غیرقانونی نظربندی کو کبھی ختم بھی کیا جائے گا۔ حریت ترجمان نے کہا کہ اس صورتحال کا سب سے زیادہ افسوسناک پہلو یہ ہے کہ اس نظربندی کے لیے حکومت کی طرف سے آج تک کوئی وضاحت نہیں کی جارہی کہ یہ قانون کے کس دفعہ اور کس شق کے تحت عمل میں لائی جارہی ہے اور اس کا کیا اخلاقی جواز ہے۔ انہوں نے کہا کہ گیلانی کی نظربندی کے اگرچہ 7سال پورا ہوگئے ہیں، البتہ اس سلسلے میں پولیس کی طرف سے کوئی کورٹ آرڈر پیش کیا جاتا ہے اور نہ انتظامیہ کا کوئی حکمنامہ دکھانے میں وہ کامیاب ہوگئی ہے۔