عظمیٰ نیوز سروس
راجوری//راجوری کے معروف گیان گنگا آشرم میں مقدس تہوار گنگا دسہرہ نہایت مذہبی عقیدت اور جوش و جذبے کے ساتھ منایا گیا، جس میں ملک بھر سے ہزاروں عقیدت مندوں نے شرکت کی۔یہ روحانی تقریب سوامی شری شری 1008 وشوتمنند سرسوتی جی مہاراج، اٹل پیٹھادھیشور راجگرو کے رہنمائی میں منعقد ہوئی، جن کی قیادت میں ہفتہ بھر جاری رہنے والی تقریبات کا اختتام ہوا۔28 مئی سے 4 جون تک جاری رہنے والے شریمد بھاگوت تتو گیان یگیہ کی شروعات ایک شاندار ’کلش یاترا‘سے ہوئی۔اس دوران شری کرشن بھگوان کی الہیٰ زندگی اور لیلائوں پر مبنی روح پرور پرواچن اور ڈرامائی انداز میں سدّاما، کنس اور راس لیلا جیسے کرداروں کی جھلکیاں پیش کی گئیں۔سوامی وشوتمنند جی نے خود شریمد بھاگوت کے گہرے فلسفے اور تعلیمات پر روشنی ڈالتے ہوئے عقیدت مندوں کو روحانی پیغام دیا۔انہوں نے اپنے خطاب میں گرو گنگ دیو جی مہاراج کی علم کے فروغ میں خدمات کو سراہتے ہوئے کہا کہ ان کی تعلیمات آج بھی انسانیت کے لئے مشعلِ راہ ہیں۔5 جون کو آخری دن ’سنت سمیلن‘ اور ’شرادھانجلی سبھا‘ کا انعقاد ہوا، جس کا مقصد گرو گنگ دیو جی مہاراج کے 40ویں نیروان دیوس کو عقیدت کے ساتھ منانا تھا۔ملک بھر کے مختلف اکھاڑوں سے آئے ہوئے سنتوں اور مہامنڈلیشوروں نے روحانی خطابات پیش کئے اور گرو جی کو خراج عقیدت پیش کیا۔اختتامی رسومات کے دوران عقیدت کے طور پر ’چھپن بھوگ‘ پیش کیا گیا اور ویدک منتر کے ساتھ گرو پوجا ادا کی گئی۔مقامی انتظامی افسران اور مختلف سماجی و مذہبی تنظیموں کے نمائندے بھی اس موقع پر موجود تھے، جن میں راجوری کے ایم ایل اے افتخار احمد بھی شامل تھے۔ انہوں نے آشرم کی روحانی خدمات کو خراج تحسین پیش کیا اور عوام کو بھائی چارے و روحانیت کا پیغام دیا۔
