گھریلو و بین الاقوامی ہوائی سروس | ایئر انڈیا نے بکنگ بند کردی

نئی دہلی// شہری ہوابازی کے وزیر ہردیپ سنگھ پوری کی مداخلت کے بعد سرکاری طیارہ خدمات کمپنی ایئر انڈیا نے ہوائی ٹکٹوں کی بکنگ فی الحال بند کردی ہے جبکہ پرائیویٹ طیارہ خدمات کمپنیوں نے ان کے مشورو ں کونظر انداز کرتے ہوئے بکنگ جاری رکھی ہے۔ایئر انڈیا نے سنیچر کے روز چنندہ راستوں کے لئے بکنگ شروع کی تھی،گھریلو راستوں پر اس نے 4 مئی سے اور بین الاقوامی سفر کیلئے یکم جون سے بکنگ شروع کی تھی۔ پوری نے کل دیر رات ایک ٹوئٹ میں کہا تھا کہ حکومت نے ابھی پروازیں شروع کرنے کے وقت کے بارے میں کوئی فیصلہ نہیں لیا ہے اور اس لئے سبھی ایئر لائنس کو فی الحال بکنگ نہ کرنے کی صلاح دی تھی۔وزیر موصوف کے ٹوئٹ کے پیش نظر ایئر انڈیا نے بکنگ بند کردی ہے ۔ اس کی ویب سائٹ پر اگرچہ پروازوں کے متبادل اب بھی دستیاب ہیں اور ساری تفصیلات داخل کرنے کے بعد ادائیگی کے وقت وہاں ‘‘گاہک کی جانب سے منتخب کی گئ سیٹ اب دستیاب نہیں ہے ’’ لکھا آتا ہے ۔ وہیں پرائیویٹ طیارہ خدمات کمپنی اب بھی بکنگ کررہی ہیں۔