سرینگر//نیشنل کانفرنس صدر ڈاکٹر فاروق عبد اللہ کی رہائش گاہ پر جمعرات سہ پہر کو اُن سیاسی لیڈروں کی مشترکہ میٹنگ شروع ہوگئی ہے جنہوں نے گپکار اعلامیہ پر دستخط کرتے ہوئے جموں کشمیر کی خصوصی پوزیشن کی بحالی کیلئے ایک ساتھ ”جد و جہد“ کا فیصلہ کیا ہے۔آج کی اس کل جماعتی میٹنگ کی خاص بات یہ ہے کہ اس میں پی ڈی پی صدر محبوبہ مفتی بھی شامل ہے جسے تین روز قبل رہا کیا گیا۔
اطلاعات کے مطابق کانگریس لیڈر غلام احمد میر ناسازی صحت کی بنا پر میٹنگ میں شامل نہیں ہوئے ہیں اور پارٹی نے اس بات کی وضاحت کی ہے کہ میر کی غیر حاضری سے متعلق فاروق کو پہلے ہی مطلع کیا گیا ہے۔
گپکار اعلامیہ اُس مشترکہ قرار داد کا نام ہے جو 4اگست2019کو نیشنل کانفرنس، پی ڈی پی،کانگریس، پیپلز کانفرنس وغیرہ نے اتفاق رائے سے پاس کی ۔اس قرار داد میں جموں کشمیر کی خصوصی پوزیشن کے تحفظ کا عزم ظاہر کیا گیا ہے۔
اطلاعات میں بتایا جارہا ہے کہ آج کی میٹنگ میں شامل ہونے کیلئے محبوبہ،سجاد لون،یوسف تاریگامی، مظفر شاہ اور دیگر مین اسٹریم لیڈران فاروق کی رہائش گاہ پر موجود ہیں۔اس کے علاوہ نیشنل کانفرنس لیڈران حسنین مسعودی، محمد اکبر لون اور ناصر اسلم وانی بھی فاروق کی رہائش گاہ پر موجود ہیں۔
