زاہد بشیر
گول//گول بازار و ملحقہ جات میں پھر سے گندگی کے ڈھیر کی وجہ سے عام لوگوں کو شدید پریشانیوں کا سامنا کرنا پڑ رہا ہے ۔ محکمہ دیہی ترقی کی جانب سے پرتمولہ میں ڈیمپنگ کی جگہ کی تعمیر کے بعد وہاں پر مقامی لوگوں نے بستی میں گندگی جمع کرنے کے خلاف عدالت کا دروازہ کھٹکھٹایا جس وجہ سے فی الحال عدالت نے یہاں پر گندگی جمع کرنے سے روک لگائی ہے اور اُس کے بعد گول بازار و ملحقہ جات میں جگہ جگہ گندگی کے ڈھیر جمع دیکھنے کو مل رہے ہیں اور عام لوگوں کو چلنا بھی محال بن گیا ہے ۔ گندگی کے ڈھیروں پر آوارہ کتوں ، جنگلی درندوں کی آمد کی وجہ سے سکولی بچوں کو بھی یہاں سے گزرنا کافی دشوار بن گیا ہے اور کسی بھی وقت کوئی بڑا حادثہ پیش آ سکتا ہے ۔ گول بازار سے صرف آدھ کلومیٹر زلس کے مقام پر جگہ جگہ نالیوں اور سڑک کے کناروں پر گندگی کے بڑے بڑے ڈھیر جمع ہیں ۔ گول بازار سے دکانداروں کی مہر بانی کی وجہ سے یہ گندگی یہاں پر پھینکی جا رہی ہے اور ان کو کوئی پوچھنے والا بھی نہیں ۔ شام کے بعد اندھیرے کا فائدہ اُٹھاتے ہوئے کچھ بے حس دکاندار بوریوں میں جمع دکانوں کی گندگی جن میں بالخصوص گلی سڑک سبزی ،مرغ دکانوں سے نکلنے والی گندگی جمع ہوتی ہے اور اس کے علاوہ دیگر گندگی کے ڈھیر بھی جمع ہیں ۔ یہاں مقامی لوگوں نے کہا کہ کچھ لوگ شام کو گول سلبلہ روڈ کے کنارے پر اندھیرے کا فائدہ اُٹھاتے ہوئے گندگی پھینک دیتے ہیں اور سڑک کی نالیوں کے ساتھ ساتھ یہاں سڑک کے کنارے اور دیگر نالوں میں بھی گندگی کے بڑے بڑے ڈھیر جمع ہیں جس وجہ سے بدبُو کے مرغولوں کی وجہ سے یہاں پر چلنا دشوار بن گیا ہے ۔ اس طرح کے حالات نہ صرف گول سلبلہ روڈ پر ہے بلکہ گول رام بن شاہراہ کے مختلف مقامات ، سب ضلع ہسپتال گول کے ساتھ نالے میں ، دتر موڑ وغیرہ شامل ہیں جہاں پر کچھ بے حس لوگ گندگی پھینک دیتے ہیں ۔ مقامی لوگوں نے انتظامیہ سے مانگ کی ہے کہ وہ ان لوگوں کی نشاندہی کریں اور ان کے خلاف کاروائی کریں ۔ ضرورت اس بات کی ہے کہ اگر کہا جا رہا ہے کہ صفائی نصب ایمان ہے وہ صفائی نہ صرف اپنے کپڑوں کو دھونا ، جسم کو دھونا ہے بلکہ گھروں کے آس پاس کی گندگی کا بھی عوام کو چاہئے کہ وہ گھروں کے آس پاس کے ساتھ ساتھ دوسرے مقامات پر گندگی نہ پھیلائیں اور اپنے آپ کو اچھا شہری اور گول کے ساتھ انصاف کا ثبوت دیں ۔
