گولے بس سٹینڈ میں بھی گرے ، کئی رہائشی ڈھانچے تباہ, ارنیا سیکٹر میںپھر گن گرج

جموں// ارنیا سیکٹر میں بین الاقوامی سرحد پر پاکستانی رینجرز کی فائرنگ سے ایک معمر خاتون ہلاک جبکہ پانچ دیگر عام شہری زخمی ہوگئے ہیں۔ زخمیوں میں ایک 12 سالہ کمسن لڑکا بھی شامل ہے۔ پولیس نے بتایا ہے کہ پاکستانی رینجرز نے سنیچر اور اتوار کی درمیانی شب ارنیا سیکٹر میں بین الاقوامی سرحد پر کم از کم دس بھارتی فوجی چوکیوں اور متعدد سرحدی دیہات کو نشانہ بنایا۔ انہوں نے بتایا کہ پاکستانی رینجرز کی جانب سے ہلکے و خودکار ہتھیاروں سے فائرنگ کی گئی اور متعدد مارٹر گولے داغے گئے۔پاکستان کی طرف سے فائرنگ کا سلسلہ گذشتہ نصف شب سے اتوار کی صبح قریب سات بجے تک جاری رہا۔ انہوں نے بتایا کہ سرحد پارپاکستانی رینجرز کی فائرنگ سے 6 عام شہری زخمی ہوئے جن میں ایک 60 سالہ معمر خاتون زخموں کی تاب نہ لاتے ہوئے دم توڑ گئی۔ مہلوک خاتون کی شناخت رتنو دیوی کے بطور ہوئی ہے۔ زخمیوں میں سے تین کی شناخت 65 سالہ مایا دیوی، 35 سالہ رجنی کمار اور 12 سالہ شبہام کمار کے بطور کی گئی ۔ انہوں نے بتایا کہ زخمیوں کو میڈیکل کالج و اسپتال میں داخل کرایا گیا ہے۔ دفاعی ترجمان نے بتایا کہ ارنیا سیکٹر میں بین الاقوامی سرحد پر تعینات بی ایس ایف جوانوں نے سرحد پار سے ہونے والی فائرنگ کا منہ توڑ جواب دیا۔ پولیس بتایا کہ پاکستانی رینجرز کی جانب سے فائر کئے گئے متعدد مارٹر گولے ارنیا بس اسٹینڈ میں گر کر پھٹ گئے۔ انہوں نے بتایا کہ سرحد پار فائرنگ کے نتیجے میں انسانی جانوں کا نقصان ہونے کے علاوہ کم از کم 3 مویشی ہلاک جبکہ متعدد دیگر زخمی ہوگئے۔ انہوں نے بتایا کہ فائرنگ کے نتیجے میں کئی رہائشی مکانات اور گاؤ خانوں کو بھی نقصان پہنچا ۔ ایک رپورٹ کے مطابق ارنیا سیکٹر میں گذشتہ چند روز سے مسلسل گولہ باری کے نتیجے میں سرحدی دیہاتیوں میں تشویش کی لہر دوڑ گئی ہے اور ان میں کئی کنبوں نے محفوظ مقامات پر واقع سرکاری اسکولوں اور مذہبی ڈھانچوں میں پناہ لے لی ہے۔ یہ بات یہاں قابل ذکر ہے کہ 15 ستمبر کو اسی سیکٹر  میں سرحد پار پاکستانی رینجرز کی فائرنگ سے برجندر بہادر سنگھ نامی بی ایس ایف کانسٹیبل ہلاک ہوا۔13 ستمبر کو جموں کے پارگوال سیکٹر اور پونچھ کے سوجیاں سیکٹر میں پاکستانی فائرنگ کے نتیجے میں بی ایس ایف کے دو اہلکار اور تین عام شہری زخمی ہوگئے۔ 4 ستمبر کو بی ایس ایف کے فوجیوں نے ارنیا سیکٹر میں بین الاقوامی سرحد پردراندازی کی ایک کوشش کو ناکام بنانے کے دوران ایک درانداز کو ہلاک کرنے کا دعویٰ کیا۔  30 اگست کو پاکستانی نے نوشہرہ سیکٹر میں جنگ بندی معاہدے کی خلاف ورزی کی۔ یکم ستمبر کو سرحد پار سے چلائے گئے سنیپر فائر کی وجہ سے بی ایس ایف کا ایک اہلکار جاں بحق ہوا۔ 28 اگست کو راجوری میں پاکستانی فوج کی فائرنگ کے نتیجے میں پانچ عام شہری زخمی ہوگئے ۔