یو این آئی
ابوظہبی// عرب ممالک نے مقبوضہ گولان کی پہاڑیوں میں بستیوں کی توسیع کے اسرائیلی حکومت کے فیصلے کی مذمت کی ہے ۔متحدہ عرب امارات نے زور دے کر کہا ہے کہ تل ابیب حکومت کے گولان کی پہاڑیوں میں بستیوں کی توسیع کے فیصلے سے خطے میں کشیدگی بڑھے گی ۔متحدہ عرب امارات کی وزارت خارجہ کی جانب سے جاری بیان میں کہا گیا ہے کہ یہ بستیوں کی توسیع کا فیصلہ بین الاقوامی قوانین کی خلاف ورزی ہے ۔سعودی عرب کی وزارت خارجہ نے اسرائیل کے اس اقدام کو شام کی سلامتی کی کوششوں کو کمزور” قرار کرنے کے مترادف قرار دیا اور اس بات پر زور دیا کہ گولان کی پہاڑیاں شام کا علاقہ ہیں۔قطر کی وزارت خارجہ نے بین الاقوامی برادری پر زور دیا ہے کہ وہ شام کی سرزمین پر اسرائیل کے حملوں کو روکنے اور بین الاقوامی قراردادوں کی تعمیل کے لیے اپنی قانونی اور اخلاقی ذمہ داریاں پوری کرے ۔عراقی وزارت خارجہ نے گولان کی پہاڑیوں میں بستیوں کی توسیع کے اسرائیل کے فیصلے کی بھی مذمت کی ہے ۔اسرائیلی وزیر اعظم کے دفتر کی جانب سے جاری ایک تحریری بیان میں بتایا گیا ہے کہ تل ابیب انتظامیہ جس نے گولان کی پہاڑیوں پر اپنے قبضے میں توسیع کی ہے اس نے خطے میں آبادیاتی ترقی کی حوصلہ افزائی کے لیے ایک منصوبے کی منظوری دے دی ہے ۔یاد رہے کہ 8دسمبر کو 61 سالہ اسد حکومت کے خاتمے کے ساتھ ہی، 27 نومبر کو شام میں دشمنی میں شدت کے بعد، شام پر اسرائیلی فوج کے حملوں میں اضافہ ہوا ہے ۔گولان کی پہاڑیوں کے آس پاس بفر زون میں داخل ہونے والی اسرائیلی فوج نے قبضے کو مزید آگے بڑھایا اور دارالحکومت دمشق کے 25 کلومیٹر کے اندر گھس گئی۔اسرائیل نے 1967 سے شام کی گولان کی پہاڑیوں پر قبضہ کر رکھا ہے ۔ اسرائیل اور شام کے درمیان 1974 میں افواج کے انخلا کے معاہدے میں بفر زون اور غیر فوجی زون کی سرحدوں کی وضاحت کی گئی تھی۔
