عظمیٰ یاسمین
تھنہ منڈی// گورنمنٹ کالج آف ایجوکیشن یا (GCOE) کے این ایس ایس یونٹ نے پرنسپل ڈاکٹر جیوتی پریہار کی قیادت میں روڈ سیفٹی ویک کے سلسلے میں آگاہی ریلی اور صفائی ستھرائی کے عہد کے سلسلے میں ایک پروگرام منعقد کیا۔ این ایس ایس پروگرام آفیسر پروفیسر سریتا ڈوگرا کی رہنمائی میں اس تقریب کا مقصد عوام میں روڈ سیفٹی اور صفائی کی اہمیت اجاگر کرنا تھا۔ این ایس ایس کے رضاکاروں اور طلباء نے ریلی نکالی، جس میں عوام کو روڈ سیفٹی کے اصول اپنانے کی ترغیب دی گئی۔ ہیلمٹ پہننے والوں کی تعریف کی گئی، جبکہ بغیر ہیلمٹ سفر کرنے والوں کو محفوظ رویے اپنانے کی تاکید کی گئی۔ طلبہ نے نعرے لگا کر پیغامات عوام تک پہنچائے۔ صفائی کے حوالے سے این ایس ایس یونٹ نے جموں میونسپل کارپوریشن (JMC) کے تعاون سے تقریب منعقد کی، جس میں صفائی کا حلف لیا گیا۔ جے ایم سی کے ارون نیئر اور رمیش وزیر نے ماحولیاتی تحفظ کی اہمیت پر روشنی ڈالی۔تقریب میں پروفیسر ستیش کمار، پروفیسر سگندا رانی، ڈاکٹر شبھرا جموال، پروفیسر کرن تھاپا، پروفیسر روپا کماری، پروفیسر دیپالی، اور ڈاکٹر شالنی شرما نے شرکت کی اور طلبہ کی کوششوں کو سراہا۔ اس موقع پر این ایس ایس کے رضاکاروں نے جوش اور لگن کے ساتھ کمیونٹی سروس کی عمدہ مثال پیش کی۔ ان کی کوششوں کو عوام اور مہمانوں نے سراہا۔ یہ تقریب روڈ سیفٹی اور صفائی کے حوالے سے شعور پیدا کرنے اور معاشرتی ذمہ داریوں کو فروغ دینے میں کامیاب رہی۔ عوام نے اس اقدام کو خوب سراہا، جو ایک محفوظ اور صاف معاشرے کی جانب اہم قدم ثابت ہوا۔
