گورنر نے بین الاقوامی یوگا میلہ کا افتتاح کیا،نقد انعامات کا اعلان

سرینگر// گورنر این این ووہرا نے آج دوسرے بین الاقوامی یوگا میلہ و بین الاقوامی یوگا سپورٹس چیمپئن شِپ 2017 کا افتتاح کیا۔میلہ کا انعقاد یوگا سوسائٹی آف کشمیر نے شیر کشمیر انٹر نیشنل کانفرنس سینٹر میں کیا ہے۔ مختلف ممالک بشمول  ویتنام، تائیوان، کنیڈا، بلغاریہ، امریکہ، نیپال اور ملک کے مختلف حصوں سے آئے قریباً300 شرکاء اس میں شرکت کر رہے ہیں۔اس موقعہ پر خاتون اول اُوشا ووہرا بھی موجود تھیں۔شرکاء کا خیرمقدم کرتے ہوئے گورنر نے شبیر احمد ڈار یوگا تھریپسٹ و کوچ کو یوگا سوسائٹی آف کشمیر قائم کرنے اور چیمپین شِپ کا انعقاد کرنے کے لئے سراہنا کی۔ انہوں نے وزیر برائے تعلیم الطاف بخاری اور چیئرمین یوگا سوسائٹی کو بھی شبیر احمد ڈار کوحوصلہ افزائی کرنے کے لئے سراہا۔ یوگا کو صحت مندذہن و جسم کے فروغ کے لئے کافی سود مند قرار دیتے ہوئے گورنر نے یوگا کی مشق کم عمری سے ہی شروع کرنے سے ذہنی و جسمانی صحت قائم رہنے کے علاوہ نظم و ضبط کا بھی پابند بناتی ہے۔گورنر نے تمام شرکاء کو خوشگوار اور آرام دہ قیام کی تمنا کرتے ہوئے منعقدین بالخصوص بین الاقوامی سیاحوں کو وادی کے دلفریب مقامات کی سیر پر لے جانے کی تجویز پیش کی۔اس سے قبل جھارکھنڈ سے آئے یوگا گرؤپ نے اور امرتسر کے سوربھ سنگھ نے ریدیمک اور آرٹسٹک یوگا پیش کیا ۔ گورنر ،خاتون اول الطاف بخاری، ڈاکٹر شہناز گنائی رکن کونسل نے یوگا میں نمایاں کارکردگی کرنے والوں اور اسے فروغ دینے والوں میں انعامات تقسیم کئے۔حاضرین کی بھاری تعداد کے سامنے یوگا کا مظاہرہ کرنے والوں کی سراہنا کرنے کے لئے گورنر نے جھار کھنڈ کے10 نوجوان یوگا مشق کرنے والوں میں31 ہزار روپے کا نقد انعام تقسیم کرنے کا اعلان کیا۔ انہوں نے یوگا کوچ پوجا رانی اور نندہ دولا دتہ کو بھی سراہا۔گورنر نے امرتسر پنجاب کے سوربھ سنگھ کی طرف سے بہترین کارکردگی کا مظاہرہ کرنے کے لئے21 ہزار روپے کے نقد انعام کا بھی اعلان کیا۔الطاف بخاری نے صحت مند زندگی کے لئے یوگا کی اہمیت پر زور دیتے ہوئے کہا کہ وہ عنقریب ریاست کے مختلف سکولوں میں یوگا کی تربیت دینے کا اہتمام کریں گے۔رکن قانون ساز کونسل شہناز گنائی بھی اس موقعہ پر موجود تھیں۔