عظمیٰ نیوز ڈیسک
لکھنو//کانوڑیوں کی بڑی تعداد گنگا کا پانی لینے کیلئے ہری دوار پہنچ رہی ہے مگر طغیانی کی وجہ سے بہت کانوڑئے گنگا کی تیز لہروں میں بھی پھنس جارہے ہیں۔ ان میں سے کچھ تو ڈوبنے بھی لگتے ہیں۔ ایسے کانوڑیوں کی جان بچاتے ہیں عاشق علی جو ایس ڈی آر ایف کے ہیڈ کانسٹبل ہیں۔ عاشق علی اور ان کی ٹیم گنگا میں ڈوبنے والے 6 کانوڑیوں کی اب تک جان بچا چکی ہے۔ انہیں کانوڑیوں میں سے ایک 21 سالہ مونو سنگھ بھی ہے جو 23 جولائی کو گنگا کی تیز لہروں میں پھنس گیا، جس کے بعد عاشق علی نے اپنی جان کی پرواہ کیے بغیر گنگا میں چھلانگ لگاکر اس کی جان بچائی۔خبروں کے مطابق منگل (23 جولائی) کو کانگڑا گھاٹ پر کانوڑ یاترا کے دوران فرید آباد کے پیر بابا محلہ کا رہنے والا ایک 21 سالہ نوجوان مونو سنگھ گنگا کی تیز لہروں میں پھنس گیا اور ڈوبنے لگا۔ گھاٹ پر تعینات ایس ڈی آر ایف کے ہیڈکانسٹبل عاشق علی کی نظر جیسے ہی ڈوبتے ہوئے مونوسنگھ پر پڑی، وہ وقت ضائع کیے بغیر گنگا میں کود گئے اور مونو سنگھ کے پاس پہنچ کر اس کی جان بچائی۔
عاشق علی کی اس بہادری کی خوب تعریف کی جا رہی ہے۔اس واقعہ کی تفصیلات بتاتے ہوئے ہیڈ کانسٹیبل عاشق علی نے انڈین ایکسپریس کو بتایا کہ وہ کانگڑا گھاٹ پر معمول کے مطابق اپنی ڈیوٹی کر رہے تھے کہ انہوں نے مونو کو دیکھا جو تیر کر گنگا نندی کو عبور کرنے کی کوشش کر رہا تھا لیکن وہ درمیان میں ہی تھک کرلہروں میں پھنس گیا۔ جس کے بعد اسے بچانے کے لیے میں نے گنگا ندی میں چھلانگ لگا دی۔ عاشق علی نے کہا کہ یہ ان کا کام ہے۔ وہ اور ان کی ٹیم برسوں سے یہ کام کر رہی ہے۔ وہ ہر سال تقریباً 40-50 کانوڑیوں کی جان بچاتے ہے۔ عاشق علی نے بتایا کہ اس کے لیے ہمیں خصوصی تربیت دی گئی ہے۔یہی نہیں بلکہ کانوڑ یاترا شروع ہونے کے بعد سے اب تک عاشق علی اور ان کی ٹیم نے دیگر 5 کانوڑیوں کی جانیں بچائی ہیں۔ ان میں سے ایک کانوڑ 21 سالہ سندیپ سنگھ ہے گورکھپور کا رہنے والا ہے۔ وہ گنگا ندی کے تیزبہاو? میں آگیا اور ڈوبنے لگا۔ عاشق علی اور ان کی ٹیم نے گنگا ندی میں چھلانگ لگا کر سندیپ سنگھ کی جان بچائی۔ دوسرا واقعہ 21 سالہ گووند سنگھ کا ہے۔ یہ کانگڑا گھاٹ پر گنگا ندی میں ڈوبنے لگا، اسی طرح 17 سالہ کرن اور 15 سالہ انکت ہے جن کی عاشق علی اور ان کی ٹیم نے اپنی جان کی پرواہ کیے بغیر جان بچائی۔ کانگڑا گھاٹ پر تعینات ایس ڈی آر ایف کی ٹیم میں کانسٹیبل شیوم سنگھ، کانسٹیبل رجت تومر اور کانسٹیبل انیل کوٹیال شامل ہیں اور عاشق علی اس پوری ٹیم کے سربراہ ہیں۔
روڑکی میں کانوڑ یاتریوں کا ہنگامہ | ای رکشہ ڈرائیور کی پٹائی اور توڑ پھوڑ
عظمیٰ نیوز ڈیسک
ہری دوار// کانوڑ یاترا شروع ہو چکی ہے اور مظفر نگر کے بعد اتراکھنڈ کے روڑکی میں کانوڑ یاتریوں کا ہنگامہ دیکھنے میں آیا ہے۔ یہاں کانوڑ یاتریوں نے ای رکشہ ڈرائیور کو بری طرح زدوکوب کیا۔ صرف اتنا ہی نہیں انہوں نے لاٹھیوں سے ای رکشہ میں توڑ پھوڑ بھی کی۔ اس دوران پولیس یاتریوں کو سمجھاتی نظر آئی لیکن انہوں نے ایک نہیں سنی۔ زخمی ای رکشہ ڈرائیور کو اسپتال میں داخل کرایا گیا ہے۔ہریدوار کے ایس ایس پی پرمیندر سنگھ ڈوبھال نے اس معاملے میں جانکاری دی ہے۔ انہوں نے بتایا کہ منگلور کوتوالی علاقہ لبرہیڑی میں ایک کانوڑ یاتری کو ای رکشہ کی ٹکر لگ گئی تھی، جس میں نہ تو یاتری زخمی ہوا اور نہ ہی کانوڑ کو نقصان پہنچا۔ اس کے باوجود کانوڑ یاتری نے اپنے کچھ ساتھیوں کے ساتھ مل کر ای رکشہ ڈرائیور کی پٹائی کی اور ای رکشہ میں بھی توڑ پھوڑ کی۔ مقدمہ درج کر لیا گیا ہے اور ملزم کانوڑ یاتریوں کی شناخت کی جا رہی ہے۔قبل ازیں، مظفر نگر میں بھی کانوڑ یاتریوں کا ہنگامہ دیکھا گیا تھا، جہاں انہوں نے کار ڈرائیور کو بری طرح زدوکوب کیا۔ مشتعل یاتریوں نے کار کے شیشے توڑ دئے اور اس کی چھت کو بھی نقصان پہنچایا۔ پولیس اہلکاروں کے روکنے کے باوجود کانوڑ یاتری نہیں رکے اور ہنگامہ کرتے رہے۔ رپورٹ کے مطابق کار کی ٹکر لگ جانے سے کانوڑ کو نقصان پہنچا تھا، جس کے بعد کانوڑ یاتری مشتعل ہو گئے تھے۔
