کشتواڑ//تحصیل پاڈر کے گندھاری گائوں میں گزشتہ روز آتشزدگی میں ہوئے نقصان پر جہاں متعدد سیاسی، سماجی اور مذہبی تنظیموں کی طرف سے افسوس کا اظہار کیا جا رہا ہے وہیں انتظامیہ کی طرف سے متاثرین کو راحت رسانی کا کام بھی جنگی سطح پر شروع کر دیا گیا ہے ۔اظہار افسوس کرنے والوں میں مقامی ممبران قانون سازیہ فردوس ٹاک ایم ایل سی، جی ایم سروڑی ایم ایل اے اندروال اور نیشنل کانفرنس کے سجاد کچلو ایم ایل سی شامل ہیں۔ جیسا کہ گزشتہ روز خبر دی جا چکی ہے کہ تحصیل پاڈر کے گاندھری کے قریب کھجرونی گائوں میں آتشزدگی کی ایک پر اسرار واردات میں 20رہائشی مکانات کو نقصان پہنچا تھا ، ان میں سے 18مکان کو جزوی جب کہ 2مکانات پوری طرح جل کر راکھ ہو گئے ہیں۔ سوم ناتھ اور امر چند کے مکانات پوری طرح خاکستر ہو چکے ہیں۔ ضلع انتظامیہ نے ٹرکوں میں بنیادی ضروریات زندگی کا مال و اسباب بدھ کی صبح روانہ کیا ، یہ سامان100کلو میٹر دور تک گاڑیوں اور خچروں پر متاثرین تک پہنچایا جائے گا۔ سرکار ی ذرائع نے بتایا کہ بھیجے گئے ریلیف میں 200کمبل،18رضائیاں،18ٹینٹ،1بنڈل فیبریکیشن،18سولر لائٹ اور برتنوں کے 12سیٹ شامل ہیں۔ قابل ذکر ہے کہ ضلع ترقیاتی کمشنر غلام نبی بلوان ، ایس ایس پی کشتواڑ سندیپ وزیر اورایگزیکٹو سیکرٹری ریڈ کراس اصغر شیخ کے علاوہ دیگر افسران نے راحت کا سامان ارسال کیا۔ پی ڈی پی لیڈر فردوس احمد ٹاک ایم ایل سی نے گزشتہ روز پاڈر کے ایک گائوں میں آتشزدگی سے مکانات کے جلنے پر شدید افسوس کا اظہار کیا ہے ۔ پریس ریلیز میں ٹاک نے کہا ہے کہ اس وقت جب کہ موسم سرما سر پر ہے ، لوگوں کے مکانات کا جلنا انتہائی بد قسمت آمیز ہے ۔ انہوں نے حکومت اور انتظامیہ سے اپیل کی ہے کہ متاثرین کی باز آبادکاری اور انہیں عبوری راحت فراہم کرنے کے لئے اقدامات کئے جائیں۔ پاڈرکے گندھاری میں پیش آئے آگ کے واقعے پرگہرے رنج والم کااِظہارکرتے ہوئے پردیش کانگریس کمیٹی کے نائب صدر اوررکن اسمبلی اندروال غلام محمد سروڑی نے ریاستی سرکارسے پرانے ضلع ڈوڈہ میں اچھی طرح سے لیس فائر سروس سٹیشن قائم کرنے کی مانگ کی ہے۔واضح رہے کہ کاچرونی گاندھری میں آگ کے ایک المناک واقعے میں قریب20رہائشی راکھ ہوئے جس میں بھاری مالی نقصان ہواہے ساتھ ہی مال مویشی بھاری تعدادمیں جان بحق ہوگیا۔ذرائع کے مطابق یہ ایک دورافتادہ علاقہ ہے جوگلاب گڑھ پاڈرسے60کلومیٹرکی دوری پرواقع ہے جہاں بدھ طبقہ کی آبادی ہے۔غلام محمد سروڑی نے متاثرہ کنبوں کیساتھ اِظہارِ ہمدردی کرتے ہوئے انتظامیہ کوہدایت دی کہ وہ انہیں ہرممکن اورفوری امدادفراہم کریں۔سروڑی نے ریاستی حکومت سے پورے خطہ چناب میں تحصیل سطح پراچھی طرح سے تمام تربنیادی ڈھانچے سے لیس فائر سروس سٹیشن قائم کرنے کی مانگ کی تاکہ اس طرح کے ناخوشگوارواقعات پیش آتے ہی جانی ومالی نقصانات کوکم کیاجاسکے۔اُنہوں نے مزیدکہاکہ ایسے سٹیشن بلاک سطح پرقائم ہونے چاہئے۔اُنہوں نے کہاکہ حالیہ برسوں میں ٹھاٹھری، کیشوان، چھاترو،مغل میدان، بونجواہ، واڑون، مڑواہ،دچھن، پاڈر، ناگسنی، درابشالہ،بھلیسہ ودیگرمقامات پرآگ کے بڑے سانحات رونماہوئے ہیں۔اُنہوں نے کہاکہ ایسے واقعات نے فائر سروس محکمہ کی کارکردگی وحالات سے نپٹنے کی صلاحیتوں وتیاریوں پرسوالیہ نشان لگادیاہے۔سروڑی نے حکومت سے مانگ کی کہ وہ ٹھاٹھری، بونجواہ، چھاترو،سرتھل، درابشالہ، ٹھاکرائی، کاہراہ بھلیسہ ،واڑون، ناگسینی قصبوں میں فوری طورپرفائر سٹیشن کھولنے کے اقدامات اُٹھائے۔
گندھاری آتشزدگی متاثرین کیلئے راحت روانہ
