گل لالہ فیسٹول یکم اپریل سے

سرینگر// محکمہ سیاحت کی جانب سے امسال’بہار کشمیر ’ کے عنوان سے میگا ٹولپ فیسٹول منایا جارہا ہے ۔یہ فیسٹول یکم اپریل سے شروع ہوگا۔سرینگر میں ڈل جھیل کے کنارے ایشیا کے سب سے بڑے گْل لالہ باغ میں 14روز تک جاری رہنے والے اس میلے میں وادی کی دستکاری مصنوعات اور پکوانوں کے سٹال لگائے جائیں گے۔سیاحت اورپھولبانی کے سیکرٹری فاروق احمد شاہ نے کہا کہ گل لالہ فیسٹول اس سال کے بہار کشمیر کا ایک حصہ ہوگا جوگل لالہ باغ میں منعقد ہوگا جہاں 46 اقسام کے 20لاکھ سے زائد گل لالہ اُگائے گئے ہیں ۔ انہوںنے کہا کہ یہ میلہ 14روز تک جاری رہے اور اس دوران وادی کی دستکاری مصنوعات اور پکوانوں پر سٹال لگائے جائیں گے۔فاروق احمد شاہ نے مزید کہا کہ اس میلے کے حاشیہ پر ایک عالمی مشاعرے کا انعقاد کیا جائے گا جس میں اُردو کے معروف شعراء شرکت کریں گے اور یہ ایک مشاعرہ اپنی نوعیت کا پہلا مشاعرہ ہوگا۔ناظم پھولبانی کشمیر ایم ایچ میر ، ناظم سیاحت کشمیر محمود احمد شاہ اور ڈپٹی ڈائریکٹر ٹورازم کشمیر ظہو ر پیرزادہ بھی اس موقعہ پر موجود تھے۔بعد میں سیکرٹری سیاحت نے ایس کے آئی سی سی کے عملے کے ساتھ تبادلہ خیال کے دوران اس عالمی ادارے میں فراہم کی جانے والی خدمات میں بہتر ی لانے پر غور و خوض کیا۔