عظمیٰ نیوز سروس
سرینگر // ڈائریکٹر اسکول ایجوکیشن کشمیر نے اتوار کو کہا کہ محکمہ نے ابھی تک گرمیوں کی تعطیلات میں توسیع کے بارے میں کوئی حتمی فیصلہ نہیں لیا ہے۔ ڈاکٹر جی این ایتو نے کہا کہ گرمیوں کی تعطیلات میں توسیع کے بارے میں حتمی فیصلے کا اعلان کرنے کے لیے پیر کو ایک جائزہ لیا جائے گا۔انہوں نے کہا کہ تازہ ترین ایڈوائزری کے مطابق موسم بہتر ہونے کا امکان ہے۔ڈاکٹر جی این ایتو نے مزید کہا کہ محکمہ گرمی کی لہر سے بچنے اور طلبا کی حفاظت پر سمجھوتہ کیے بغیر تعلیمی سرگرمیاں کرنے کے لیے متبادل حکمت عملی کے ساتھ تیار ہے۔وزیر تعلیم نے پہلے کہا تھا کہ گرمیوں کی تعطیلات میں توسیع کے بارے میں فیصلہ کرنے کے لیے اتوار کو جائزہ لیا جائے گا۔سکولوں کے لیے گرمیوں کی 15 دن کی تعطیلات کا اعلان 23 جون سے 7 جولائی 2025 تک کیا گیا۔مقررہ تاریخ کے مطابق، سکول 8 جولائی 2025 کو موسم گرما کی تعطیلات کے بعد دوبارہ کھلیں گے، اگر سکول ایجوکیشن ڈیپارٹمنٹ کی جانب سے کسی توسیع کا اعلان نہیں کیا جاتا ہے۔
