عاصف بٹ
کشتواڑ //اطلاعات و نشریات و امور کے مرکزی وزیر انوراگ ٹھاکر نے کشتواڑ میں اجتماع کے دوران گاندھی و شیخ خاندان کو تنقید کا نشانہ بناتے ہوئے کہاکہ دونوں خاندان ملک اور جموں وکشمیر کی تعمیر وترقی میں سب سے بڑی رکائوٹ رہے ہیں ۔انوراگ ٹھاکر منگل کو کشتواڑ کے دورے پر تھے جس کے دوران انھوں نے کشتواڑ و پاڈر کا دورہ کیا اور عوام سے بی جے پی کے حق میں ووٹ ڈالنے کی اپیل کی ۔منگل کی صبح بی جے پی کارکنان نے مالی پیٹھ سے چوگان تک انوراگ ٹھاکر کی سربراہی میں ریلی نکالی۔جس کے دوران کارکنان ڈول نگاڑے پر رقص کرتے رہے۔ چوگان میں بھاری اجتماع سے خطاب کرتے ہوئے انوراگ ٹھاکر نے کہا کہ گاندھی خاندان سے لیکر شیخ و مفتی خاندان نے کشتواڑ کی عوام کیساتھ اسطرح کا سوتیلی ماں کا سلوک کیوں کیا یہاں کے لوگوں نے قربانیں دی اور ان خاندانوں نے اسکا فائدہ اٹھایا۔انہوں نے کہاکہ 2014 سے پہلے ملک میںبد عنوانی کا راج تھاجس کی وجہ سے ملک کھوکھلا ہوچکاتھا اور ملک کی عوام نے دیش کو چلانے والی حکومت کو لایا جس کے بعد ملک تعمیر و ترقی کی راہ پر گامزن ہو گیا اور اس وقت ہندوستان دنیا کی پانچویں سب سے بڑی معیشت کے طور پرسامنے آیا ہے ۔انوراگ سنگھ ٹھاکر نے کہا کہ خاندان پر مبنی پارٹیوں نے جموں و کشمیر کی ترقی کو روک دیا ہے جبکہ مودی جی نے جموں و کشمیر کے لوگوں کی امنگوں کو نئے بازو دئیے ہیں۔ جموں و کشمیر میں انتخابات کو لے کر بے پناہ جوش و خروش ہے۔ ملک کے باقی حصوں کی طرح یہاں بھی کمل کھلے گا کیونکہ ہندوستانی اتحاد کے لوگ ملک کو ذات پات، مذہب، علاقہ اور زبان کے نام پر تقسیم کرتے ہیں اور ہم ان کو متحد کرتے ہیں۔انوراگ ٹھاکر نے کہا کہ ’’جموں و کشمیر کی ترقی کو خاندانی پارٹیوں نے روک دیا تھا جبکہ مودی جی نے جموں و کشمیر کی ترقی کو نئے بازو دیے ہیں۔ آرٹیکل 370 ہٹائے جانے کے بعد جموں و کشمیر دراصل ہندوستان میں شامل ہو کر آگے بڑھ رہا ہے۔ پچھلے سال 2 کروڑ 10 لاکھ سے زیادہ سیاح جموں و کشمیر آئے تھے۔ آنے والے سالوں میں یہ تعداد 3 کروڑ سے تجاوز کر جائے گی۔ عمر عبداللہ کی طرف سے بھارتیہ جنتا پارٹی کو جموں و کشمیر میں مسلم مخالف پارٹی قرار دینے کو بے بنیاد قرار دیتے ہوئے انوراگ ٹھاکر نے کہا کہ ان خاندانی جماعتوں کا کام صرف جھوٹ، انتشار اور بدعنوانی پھیلانا ہے۔ انوراگ ٹھاکر نے کہا کہ دفعہ 370 اور 35A نہرو جی اور کانگریس کی غلطیاں تھیں جس کی وجہ سے جموں و کشمیر کے لوگوں کی ترقی میں رکاوٹ پیدا ہوئی اور ہم نے اپنے بہت سے بہادر سپاہیوں کو کھو دیا جبکہ مودی جی نے اپنی غلطیوں کو سدھار لیا ہے۔انوراگ ٹھاکر نے کہا کہ مودی جی کی قیادت میں ہماری حکومت نے پچھلے 10 سالوں میں سب کا ساتھ، سب کا وکاس اور سب کا وشواس کے بنیادی منتر کے ساتھ کام کیا ہے۔انوراگ ٹھاکر نے عوام سے کہا کہ اگر آپ مودی جی کو تیسری بار وزیر اعظم بناتے ہیں تو ہم ملک کو دنیا کی تیسری سب سے بڑی معیشت بنا دیں گے۔
