یو این آئی
نئی دہلی//وزیر اعظم نریندر مودی نے کہا کہ دیہی ہندوستان کے لوگوںکیلئے باوقار زندگی کو یقینی بنانا ان کی حکومت کی اولین ترجیح ہے اور اس لئے ہر گائوں میں بنیادی سہولیات کی ضمانت دینے کیلئے ایک مہم شروع کی گئی ہے۔ یہاں نبارڈ کے زیر اہتمام چار روزہ دیہی ہندوستان مہوتسو 2025کا افتتاح کرتے ہوئے وزیر اعظم نے کہا’’ہمارا مقصد دیہاتوں کو ترقی اور مواقع کے متحرک مرکزوں میں تبدیل کرکے دیہی ہندوستان کو بااختیار بنانا ہے۔ ہماری حکومت کے ارادے، پالیسیاں اور فیصلے دیہی ہندوستان کو نئی توانائی کے ساتھ بااختیار بنا رہے ہیں‘‘۔انہوں نے کہا کہ ہندوستان کوآپریٹیو کے ذریعے خوشحالی حاصل کرنے میں مصروف ہے۔ انہوں نے کہا کہ سال کے آغاز میں دیہی ہندوستان مہوتسو کی شاندار تقریب ہندوستان کے ترقی کے سفر اور اس کی شناخت کی ایک جھلک پیدا کر رہی ہے۔ وزیر اعظم نے کہا کہ ہم میں سے جو دیہات میں پیدا ہوئے اور پلے بڑھے وہ دیہات کی صلاحیت کو بخوبی جانتے ہیں۔ انہوں نے کہا کہ گائوں کی روح دیہات میں رہنے والے لوگوں میں بھی رہتی ہے۔وزیراعظم نے کہا کہ جو لوگ دیہات میں رہتے ہیں وہ بھی جانتے ہیں کہ حقیقی دیہاتی زندگی کیسے گزاری جاتی ہے۔ انہوں نے کہا کہ وہ خوش قسمت ہیں کہ ان کا بچپن ایک چھوٹے سے قصبے میں سادہ ماحول میں گزرا۔ بعد میں جب وہ شہر سے باہر چلے گئے تو انہوں نے دیہی علاقوں میں بھی وقت گزارا۔ مودی نے کہا کہ میں نے مشکلات کا تجربہ کیا ہے اور دیہات کی صلاحیت سے بھی آگاہ ہوں۔
انہوں نے کہا کہ بچپن سے دیکھا ہے کہ گاں کے لوگ محنتی ہوتے ہیں لیکن سرمائے کی کمی کی وجہ سے وہ مناسب مواقع سے محروم رہتے ہیں۔ انہوں نے مزید کہا کہ مختلف علاقوں میں دیہاتیوں کی مختلف صلاحیتوں کے باوجود وہ اپنی بنیادی سہولیات کی تکمیل کی خواہش میں کھو جاتے ہیں۔ وزیراعظم نے کہا کہ کسانوں کو قدرتی آفات، منڈیوں تک رسائی کی کمی جیسے کئی چیلنجز کا سامنا ہے۔انہوں نے کہاکہ ترقی یافتہ ہندوستان کی تعمیر گائوں کی ترقی سے ہی کی جا سکتی ہے۔انہوںنے کہا کہ کچھ لوگ ذات پات کے نام پر سماج میں زہر پھیلانے اور سماجی تانے بانے کو کمزور کرنے کی کوشش کر رہے ہیں۔ مودی نے کہا کہ گائوں کی شناخت ہم آہنگی اور محبت پر مشتمل ہوتی ہے لیکن کچھ لوگ ذات پات کے نام پر سماج میں زہر پھیلانے اور سماجی تانے بانے کو کمزور کرنے کی کوشش کررہے ہیں۔ انہوں نے ان سازشوں کو ناکام بنانے اور گائوں کی مشترکہ ثقافت کو برقرار رکھنے کیلئے سرگرمی سے کام کرنے کی لوگوں سے اپیل کی ۔
