سرینگر //کھیل کود کے وزیر مولوی عمران رضا انصاری نے کہا ہے کہ کھیل کود مقابلوں میں نوجوانوں کی بڑھتی ہوئی شرکت سے کھیل کود میں ان کے رحجان کا پتہ چلتا ہے ۔ انہوں نے کہا کہ رواں سال قومی سکول گیموں میں گذشتہ سال 400 کے مقابلے میں 1800 طلبا نے حصہ لیا جو کہ کافی حوصلہ بخش ہے ۔ ان خیالات کا اظہار وزیر نے آج بخشی سٹیڈیم میں انڈر 19 فُٹ بال ٹورنامنٹ اورجا 2017 کی اختتامی تقریب سے خطاب کرتے ہوئے کیا ۔ انہوں نے کہا کہ ریاستی سرکار ریاست میں کھیل کود کے بنیادی ڈھانچے کو بہتر بنانے کیلئے کار بند ہے ۔ انعامات تقسیم کرتے ہوئے وزیر نے شرکاء کو مبارکباد دی انہوں نے کھلاڑیوں کے نظم و ضبط کی تعریف کرتے ہوئے کہا کہ نوجوانوں کی صلاحیتوں کو مثبت سمت دینے کی ضرورت ہے ۔
تقریب پر پولیس کے سربراہ ایس پی وید ، سیکرٹری یوتھ سروسز و سپورٹس ہلال پرے ، ڈائریکٹر یوتھ سروسز اینڈ سپورٹس اور دیگر اعلیٰ افسران موجود تھے ۔
