سمت بھارگو
جموں// جموں و کشمیر کے کٹھوعہ ضلع میں گھات لگا کر حملہ کرنے والے ملی ٹینٹوںکی تلاش کے لیے کم از کم 24 لوگوں کو حراست میں لیا گیا ہے۔ اس حملے میں5 فوجی اہلکار مارے گئے تھے۔ تلاشی آپریشن بدھ تیسرے دن بھی گھنے جنگلات میں وقفے وقفے سے موسلادھار بارش کے درمیان جاری رہا۔انہوں نے کہا کہ ملی ٹینٹوں کا سراغ لگانے اور انہیں بے اثر کرنے کی کوششیں جاری ہیں جن کے بارے میں خیال کیا جاتا ہے کہ وہ جنگل میں چھپے ہوئے ہیں۔اس دوران ادہم پور سے 164کلو میٹر دور بسنت گڑھ علاقے کے سنگ گائوں میں رات کے 8بجے کے قریب پولیس چوکی میں ڈیوٹی دے رہے پولیس اہلکار نے نزدیکی جھاڑیوں میں ملی ٹینٹوں کی مشتبہ نقل و حرکت دیکھی جس کے بعد اسنے فائر کھول دیا۔ اس موقعہ پر ملی ٹینٹوں نے بھی گولیاں چلائیں اور فائرنگ کا تبادلہ مختصر وقت تک جاری رہا لیکن اسکے دوران ہی ملی ٹینٹ تارت کی تاریکی میں فرار ہوگئے۔بڑے پیمانے پر سیکورٹی فورسز نے ایک وسیع علاقے کو گھیرے میں لیا ہے اور ملی ٹینٹ مخالف آپریشن کا آغاز کردیا ہے۔
آپریشن
کٹھوعہ تلاشی آپریشن کے بارے میں حکام نے بتایا کہ آپریشن کو6 مختلف علاقوں سے شروع کیا گیاہے۔ ادھم پور، سانبہ، راجوری اور پونچھ اضلاع کے مختلف حصوں میں گھنے جنگلات میں فوج اور پولیس اہلکار بھی تعینات ہیں۔انہوں نے بتایا کہ بدھ کی صبح سانبہ کے لالہ چک علاقے، راجوری کے گوردن، ریاسی کے چسانہ اور پونچھ کے سرنکوٹ میں بھی تلاشی کارروائی شروع کی گئی۔اسکے علاوہ ادہم پور، بھدرواہ اور کھٹوعہ کے جنگلاتی علاقوں میںتلاشیاں جاری ہیں۔ حکام نے بتایا کہ بھدرواہ کی طرف سے، سیکورٹی اہلکار علاقے کی چیلنجنگ ٹپوگرافی، گھنے جنگلات اور قدرتی غاروں کی وجہ سے احتیاط سے آگے بڑھ رہے ہیں۔انہوں نے بتایا کہ فوج کے خصوصی دستوں “پیرا” یونٹ کے اہلکاروں کو بھی مخصوص علاقوں میں سرجیکل آپریشن کرنے کے لیے تعینات کیا گیا ہے۔ حکام نے بتایا کہ تلاش کرنے والی ٹیموں کو ہیلی کاپٹر اور ڈرون کی نگرانی کی مدد حاصل ہے۔ اس کے علاوہ، سونگھنے والے کتوں کو تعینات کیا گیا ہے اور میٹل ڈیٹیکٹر استعمال کیے جا رہے ہیں۔ انہوں نے کہا کہ قومی تحقیقاتی ایجنسی کی ایک ٹیم نے گھات لگا کر جائے وقوعہ کا دورہ کیا اور وہ تحقیقات میں پولیس کی مدد کر رہی ہے۔پولیس نے بتایا کہ ڈوڈہ ضلع کے اونچے علاقوں میں ایک اور تلاشی مہم جاری ہے۔ حکام نے بتایا کہ پولیس اور فوج کے اہلکار گھڈی بھگوا جنگل کے علاقے میں تلاشی لے رہے ہیں، جو ڈوڈہ شہر سے تقریباً 35 کلومیٹر مشرق میں ہے اور ضلع کشتواڑ سے متصل ہے۔ملی ٹینٹوں کی تلاش کے لیے آپریشن، جن کے بارے میں خیال کیا جاتا ہے کہ وہ منگل کے تصادم میں زخمی ہوئے تھے، بدھ کی صبح دوبارہ شروع ہوا۔ حکام نے بتایا کہ ملی ٹینٹوں کا ابھی تک سراغ نہیں لگایا جا سکا ہے۔
کھٹوعہ حملہ کیسے ہوا؟
سیکورٹی فورسز کا کہنا ہے کہ مناسب مواصلاتی رابطے کی کمی ان عوامل میں شامل تھے جنہوں نے کٹھوعہ ضلع کے بلاور کے ماچیڈی علاقے کے گاں بدنوٹا میں دو فوجی ٹرکوں پر حملے میں اہم کردار ادا کیا۔ حکام اور عینی شاہدین کے بیانات سے اکٹھی کی گئی رپورٹس سے پتہ چلتا ہے کہ نوجوانوں نے پہاڑیوں پر ملی ٹینٹوں کی نقل و حرکت دیکھی تھی لیکن ان کے پاس مقامی فورسز کیمپوں کی تعداد کے بارے میں معلوم نہیں تھا۔ مزید یہ کہ علاقے میں موبائل ٹیلی فون کا نیٹ ورک انتہائی ناقص تھا اور انہیں پیغام پہنچانے میں مشکل پیش آئی۔ چند منٹ بعد، انہوں نے گولیوں کی آوازیں سنی، جو کافی دیر تک جاری رہی، اور انہوں نے خود کو اپنے گھروں تک محدود کر لیا۔اس حملے کے پیچھے سڑک کی خراب حالت بھی ایک وجہ تھی ۔مقامی لوگوںکے مطابق کچے اور کیچڑ سے بھری سڑک پر آرمی ٹرک کے آگے ایک ٹپر بہت سست رفتار سے چل رہا تھا جس کی وجہ سے آرمی کے ٹرکوں نے اپنی رفتار کم کردی حالانکہ ان کے ٹرک بری حالت میں بھی تیزی سے چل رہے تھے۔ سڑک کی پٹی ٹرکوں کی سست رفتاری نے ملی ٹینٹوں کو فوج کی گاڑیوں پر دستی بم اور گولیوں کی بارش کرنے کا بھی کافی موقع فراہم کیا۔لوگوںنے کہا، “ہم نے شاذ و نادر ہی دیکھا کہ سیکورٹی اہلکاروں سمیت پولیس اہلکاروں کو علاقے میں گشت کرتے ہوئے دیکھا گیا، حالانکہ اطلاعات یہ بتا رہی تھیں کہ ملی ٹینٹ سرحد سے دراندازی کے بعد بسنت گڑھ اور پھر بھدرواہ پہنچنے کے لیے پہاڑی راستہ اختیار کر رہے تھے،” ۔انہوں نے کہا کہ سڑک کی خراب حالت اور موسم کی خرابی کی وجہ سے فوج اور پولیس کی اضافی نفری کی موقع پر آمد میں تاخیر ہوئی جس کی وجہ سے زخمی فوجی جوانوں کا طویل علاج کیا گیا جنہیں سڑک کے ذریعے بلاور کے سب ڈسٹرکٹ ہسپتال لے جانا پڑا۔ مقامی لوگوں نے بتایا کہ شدید زخمی ہونے کے باوجود فوجی جوانوں نے حملے کا بہت مثر طریقے سے جوابی کارروائی کی جس سے ملی ٹینٹ موقع سے فرار ہو گئے کیونکہ بصورت دیگر جانی نقصان زیادہ ہو سکتا تھا۔اطلاعات کے مطابق چار دہشت گردوں اور دو گائیڈوں نے حملے میں سہولت کاری کی۔ تاہم، یہ تحقیقات کا حصہ ہوگا کہ آیا ملی ٹینٹ اور گائیڈ بسنت گڑھ سے آئے تھے یا تازہ دراندازی گروپ کا حصہ تھے، حملہ کے بعد تمام فرار ہو گئے۔
