محمد تسکین
بانہال // پیر پنچال ادبی فورم بانہال کی طرف سے کڑج منگت تحصیل کھڑی میں ایک شاندار ادبی تقریب کا انعقاد کیا گیا۔ یہ تقریب زیر صدارت ڈاکٹر خالد رسول منعقد ہوئی جبکہ ڈاکٹر طارق مرغوب مہمان خصوصی ، ایوب صابر مہمان ذی وقاراور ڈاکٹر ظاہر بانہالی بھی ایوان صدارت میں براجمان رہے۔ اس تقریب کا انعقاد تین نشستوں میں کیا گیا اور اس پروگرام کا افتتاح تلاوتِ کلامِ اللہ عزوجل اور نعت محمد صلی اللہ علیہ وسلم سیکیاگیا۔ تلاوت کا شرف محمد رمضان بٹ بزلہ اور نعتیہ کلام کا شرف حنظلہ بانہالی کو حاصل رہا۔ اسکے بعد پہلی نشست میں ڈاکٹر ظاہر بانہالی نے خطبہ استقبالیہ پیش کیا جس میں تقریب میں شر کت کرنے والے مہمانوں کا کڈجی منگت کی سرسبز اور شاداب سرزمین پر والہانہ استقبال کیا گیا۔ پیر پنچال ادبی فورم بانہال کا ترانہ دونوں آڈیو اور ویڈیو کلپ کی صورت میں پیش کیا گیا۔ بہار احمد بہار، بہار احمد میر، حنظلہ بانہالی، عبدالوحید مطرب و دیگر فنکاروں نے چلنت میں اپنے فن کا مظاہرہ کرتے ہوئے سامعین کو اپنے کلام سے محظوظ کیا۔دوسری نشست میں محمد یوسف بمبور صدر ، “بومبرن باغ کاشر بزم ادب مہو”نے ڈاکٹر مرغوب بانہالی کی سوانح حیات اور ادبی خدمات پر روشنی ڈالی۔
گلستان نیوز چینل سے وابستہ سینئرجرنلسٹ عارف وحید کوپیر پنچال ادبی فورم کی طرف سے شال پوشی کر کے عزت افزائی کی گئی اور اچھی کارکردگی کے لئے سرٹیفیکیٹ بھی تفویض کی گئی۔ مظفر بشیر نے مختصر انداز میں گل جان کے سماجی و ادبی خدمات بیان کئے۔ گل محمد جان کو بہتر ین سماجی اور ادبی خدمات کی کارکردگی کے لیے شال پوشی کی گئی اور” مرغوب ادبی ایوارڈ 2023ء ” سے نوازا گیا۔اسکے بعد گل محمد جان کی بنائی ہوئی نئی بزم” رنگہ آب گلستانِ بزمِ ادب منگت” کی رسم افتتاح ڈاکٹر طارق مرغوب نے کی جبکہ ڈاکٹر ظاہر بانہالی، ڈاکٹر خالد رسول، محمد یوسف بمبور، مزمل یزدانی ودیگر معزز شخصیات بھی رسم افتتاح کی تقریب میں موجود تھے۔ تیسری نشست میں کثیر اللسان مشاعرے کا انعقاد کیا گیاجس میں محمد یوسف بمبور، محمد مزمل یزدانی، ایوب صابر، ڈاکٹرظاہر بانہالی، بہار احمد بہار، گل محمد جان، محمد رمضان بٹ، مولوی غلام قادر المعروف ابو حماد اور پوگلی بزم ادب کے سر براہ عبدالطیف بلبل وغیرہ نے اپنے اپنے کلام سے سامعین کو محظوظ کیا۔ ڈاکٹر طارق مرغوب نے اپنے خطاب میں ڈاکٹر ظاہر بانہالی ودیگر ادبی انجمنوں کی کارکردگی کی داد دیتے ہوئے ، مہومنگت کے لوگوں کی شفقت ،سادگی، خدمت اور مہمانوازی کی سراہنا کی۔ ڈاکٹر خالد رسول نے اپنے صدارتی خطبے میں پیر پنچال ادبی فورم بانہال کی کاوشوں اور ادبی خدمات کی سراہنا کی۔ تحریک شکرانہ ریاض گل نے پیش کی جس میں تمام مہمانوں کا شکریہ ادا کیا گیا۔مزمل یزدانی نے نظامت کے فرائض نہایت ہی خوش اسلوبی کے ساتھ انجام دے اور بعد دوپہر تقریباً چار بجے اس تقریب کا اختتام نہایت ہی خوش اسلوبی اور شاندار طریقے سے ہوا۔
