سرینگر //کڑاکے کی ٹھنڈ کے باوجو د بھی سرینگر کے معروف سنڈے مارکیٹ میں لوگوں نے اشیاء ضروریہ کی خریداری کی۔ سنڈے مارکیٹ میں غیر معمولی رش دیکھنے کو ملا جس کے دوران لوگوں نے گرم ملبوسات کے ساتھ ساتھ دیگر اشیائے ضروریہ کی خریداری کی۔ پولو گرائونڈ،لالچوک، گھنٹہ گھر، ہری سنگھ ہائی اسٹریٹ میںسڑکوں پر جگہ جگہ چھاپڑی فروشوںنے چھاپڑیاں لگائی تھیں جن پر ملبوسات کے ساتھ ساتھ کھلونے ، کمبل، جوتے، کراکری، موزے، جیکٹ اور دیگر اشیاء سجائی تھی۔ لالچوک میں لوگوں صبح سے ہی خریداری کرنے میں مصروف رہے اوروقت گزرنے کے ساتھ ساتھ بازاروں میں رش بڑھتا گیا۔ لوگ ،جن میں خواتین کی بڑی تعداد شامل تھی ،اشیائے ضروریہ اور خوردنوش کے علاوہ دیگر چیزوں کی خریداری میں مصروف تھے۔ رش کی وجہ سے سڑکوں پر ٹریفک جام کے مناظر دیکھنے کو ملے جس کی وجہ سے لوگوں کو چلنے پھرنے میں دشواریوں کا سامنا کرنا پڑا۔اس دوران ناجائز منافع خوروں کی طرف سے لوٹ کھسوٹ کا بازار گرم کر رکھا تھا اور چھوٹ کے نام پر لوٹ کا بازار گرم کیا گیا تھا ۔سی این آئی
کڑاکے کی ٹھنڈ میں سنڈے مارکیٹ گرم رہا | لوگوں نے اشیایہ ضروریہ کی خریداری کی
