نیوز ڈیسک
کپواڑہ// کپواڑہ پولیس نے ضلع میں کراس ایل او سی اسمگلنگ اور اسلحہ اور گولہ بارود کی نقل و حمل میں ملوث تین بالائی ورکروں کو گرفتار کرنے کا دعویٰ کیا ہے۔
پولیس کے مطابق مخصوص معلومات کی بنیاد پر، کہ ایک او جی ڈبلیو ماڈیول وادی میں سرگرم دہشت گرد تنظیموں کے لیے کام کر رہا ہے اور وادی میں عسکری سرگرمیوں کو پھیلانے میں ملوث عسکریت پسندوں کو دستیاب کرانے کے لیے ایل او سی کے پار سے ہتھیاروں کی سمگلنگ میں ملوث ہے،پولیس تھانہ کرناہ کی ٹیم نے ایس ایچ او مدثر احمد کی سربراہی میں ڈپٹی ایس پی سید مجید کی نگرانی میں علاقے کے مختلف علاقوں سے تینوں کو گرفتار کیا۔
تینوں کی شناخت محمد عامر ولد محمد شکور کالس، نثار احمد ولد منظور کالس ساکنہ ہجیترا کرناہ اور کفیل احمد ولد مرحوم عبدالرحمن بھٹ ساکن سدھ پورہ کرناہ کے طور پر ہوئی ہے ۔
پولیس کا کہنا ہے کہ حراست میں پوچھ گچھ کے دوران اُنہوں نے انکشاف کیا کہ وہ اسلحہ کی سمگلنگ میں ملوث ہیں۔ وادی میں سرگرم عسکریت پسندوں کو مزید ہتھیار دستیاب کرانے کے لیے ایل او سی کے پار سے گولہ بارود سمگل کرتے ہیں۔ ان کے اعترافی بیان پر اب تک ایک چینی پستول کے ساتھ ایک میگزین اور 14 زندہ کارتوس برآمد ہوئے ہیں۔
اُنہوں نے کہا کہ آنے والے دنوں میں مزید بازیابیاں اور گرفتاریاں متوقع ہیں۔ اسی سلسلہ میں ایک ایف آئی آر نمبر 32/2022 سیکشن 7/25 آئی اے ایکٹ،زیرِ دفعہ 13،18،23،39 یو اے (پی) ایکٹ کے تحت درج کیا گیا ہے اور تحقیقات شروع کی گئی ہیں۔
