کپتان وراٹ کوہلی بننے والے ہیں والد

ممبئی/ ہندوستانی کرکٹ ٹیم کے کپتان وراٹ کوہلی کی اہلیہ انوشکا شرما امید سے ہیں جس کا اعلان انہوں نے سوشل میڈیا پر پیغام جاری کر تے ہوئے کیاہے ۔تفصیلات کے مطابق کپتان کوہلی اور انوشکا شرما نے 11 دسمبر 2017 میں شادی کی تھی تاہم اب شادی کے تقریبا تین سال کے بعد وہ اپنے پہلے بچے کی پیدائش کے منتظر ہیں ۔انوشکا شرما اور وراٹ کوہلی نے نہایت خوبصورت تصویر سوشل میڈیا پر جاری کرتے ہوئے اپنے مداحوں کو خوشخبری سنائی ۔ ویرات کوہلی نے ٹویٹر پر پیغام جاری کرتے ہوئے اپنی اور انوشکا کی تصویر جاری کی جس میں دیکھا جا سکتا ہے کہ انوشکا کالے رنگ کے لباس میں نہایت خوش دکھائی دے رہی ہیں جبکہ ان کے عین پیچھے بڑی سی مسکراہٹ کے ساتھ وراٹ کوہلی کھڑے ہیں ۔کوہلی کا پیغام میں کہنا ہے کہ ’’ اور اب ہم تین ہونے جارہے ہیں ، جنوری 2021 میں آمد متوقع ہے ‘‘۔تصویر میں یہ بھی واضح دکھائی دیتاہے کہ 32 سالہ اداکارہ انوشکا شرما امید سے ہیں ۔ وراٹ کے ساتھ ہی انوشکا شرما نے بھی اسی تصویر کے ساتھ بالکل ایسا ہی پیغام اپنے ٹویٹر پر بھی جاری کیا ، انوشکا شرما اور کوہلی کو ہر طرف سے مبارک باد کے پیغامات موصول ہونا شروع ہو گئے ہیں ۔یو این آئی