عظمیٰ نیوزسروس
جموں//انسداد بدعنوانی بیورو (اے سی بی) نے پیر کو کہا کہ حلقہ تھوتھے چک، ہیرا نگر، کٹھوعہ کے ایک پٹواری کو 30,000روپے کی رشوت مانگنے اور قبول کرنے کے الزام میں پھانس کر گرفتار کیا ہے۔ایک ترجمان نے کہا کہ اینٹی کرپشن بیورو کو ایک شکایت موصول ہوئی ہے جس میں الزام لگایا گیا ہے کہ سرکاری ملازم لیاقت علی، پٹواری، پٹوار حلقہ تھوتھے چک تحصیل ہیرا نگر، ضلع کٹھوعہ نے شکایت کنندہ سے انتقال کی تصدیق کے لیے غیر قانونی تسلی کا مطالبہ کیا۔بیان میں کہا گیا ہے کہ “ملزم نے اپنی بیوی کا نام میوٹیشن رجسٹر میں درج کرنے کے لیے شکایت کنندہ سے 1,00,000روپے رشوت طلب کی تھی، بات چیت کے بعد، ملزم نے شکایت کنندہ سے دو قسطوں میں 70ہزارروپے رشوت لینے پر آمادگی ظاہر کی ہے”۔شکایت کنندہ نے مذکورہ پٹواری کو ادائیگی کے لیے پہلی قسط کے طور پر 30,000روپے رشوت کا بندوبست کیا۔اس میں مزید کہا گیا ہے کہ چونکہ شکایت کنندہ رشوت دینا نہیں چاہتا تھا اور اس نے ملزم سرکاری ملازم کے خلاف قانون کے تحت قانونی کارروائی کے لیے اینٹی کرپشن بیورو سے رجوع کیا۔بیان میں مزید کہا گیا ہے کہ “شکایت کی وصولی پر، ایک محتاط تصدیق کی گئی، جو متعلقہ سرکاری ملازم کی طرف سے رشوت کی مانگ کی تصدیق کرتی ہے اور اسی کے مطابق، بدعنوانی کی روک تھام ایکٹ، 1988 کے تحت ایف آئی آر نمبر 13/2025 زیردفعہ7 پولیس اسٹیشن اے سی بی جموں میں درج کیا گیا اور تفتیش شروع کی گئی”۔تفتیش کے دوران ترجمان نے بتایا کہ گزیٹڈ رینک کے افسر کی سربراہی میں ٹریپ ٹیم تشکیل دی گئی تھی۔بیان میں کہاگیا “ٹیم نے ایک کامیاب جال بچھا دیا اور ملزم سرکاری ملازم آزاد گواہوں کی موجودگی میں شکایت کنندہ سے 30,000 روپے رشوت طلب کرتے ہوئے رنگے ہاتھوں پکڑا گیا، ملزم کو قانونی کارروائی کے بعد اے سی بی کی ٹیم نے موقع پر ہی گرفتار کیا، رشوت کی رقم بھی اس کے قبضے سے برآمد کر لی گئی جبکہ آزاد گواہ اور مجسٹریٹ کی موجودگی میں کشن پور، ڈنگارا، بلاور، ضلع کٹھوعہ میں واقع ملزم کا رہائشی مکان کی تلاشی لی گئی اور تفتیشی ٹیم کی موجودگی میں تفتیش جاری ہے‘‘۔
