عظمیٰ نیوزسروس
جموں //مہا کمبھ میلہ 2025اختتام پذیر ہونے کے ساتھ ہی کٹرہ اور سرینگر کے درمیان ’’ وندے بھارت ایکسپریس ‘‘ ریل سروس کی شروعات آئندہ ایک ہفتے میں متوقع ہے ۔ ریل سروس کو کٹرہ جموں سے وزیر اعظم نریندر مودی ہری جھنڈی دکھا کر افتتاح کریں گے۔یہ وندے بھارت ایکسپریس ویشنو دیوی کٹرہ اور سرینگر کے درمیان چلے گا۔ بعد میں اس نیم تیز رفتار ٹرین کو جموں توی تک بڑھایا جائے گا۔ ٹرین کی دیکھ بھال اور اسے شمالی ریلوے زون کے ذریعے چلایا جائے گا۔ٹرین کے باضابطہ آغاز کیلئے مسافروں میں امیدیں بہت زیادہ ہیں۔ بہت سے لوگ اپنی بے تابی کا اظہار کر رہے ہیں، سروس کو جلد از جلد شروع کرنے پر زور دے رہے ہیں۔جموں سے سرینگر وندے بھارت ٹرین ٹکٹ کی آن لائن بکنگ کی قیمت ریلوے کے پی آر ایس کاؤنٹرس سے زیادہ ہوگی۔ اس کی وجہ یہ ہے کہ آئی آر سی ٹی سی آن لائن ٹکٹنگ کی سہولیات فراہم کرنے پر کافی خرچ کرتا ہے اور ٹکٹنگ کے بنیادی ڈھانچے کی دیکھ بھال، اپ گریڈیشن اور توسیع میں اٹھنے والے اخراجات کو ادا کرنے کے لیے، آئی آر سی ٹی سی کی طرف سے ایک سہولت فیس عائد کی جاتی ہے۔یہ وادی کشمیر کیلئے پہلی سیمی ہائی سپیڈ ٹرین اور یونین ٹریٹری کیلئے تیسری ٹرین ہوگی۔ٹرین جو پہلے ہی خطے میں پہنچ چکی ہے، کامیابی سے اپنا آزمائشی دوڑ مکمل کر چکی ہے۔ حکام نے بتایا کہ وزیر اعظم جموں ڈویژن سے خصوصی طور پر تیار کردہ وندے بھارت ایکسپریس کو جھنڈی دکھا کر روانہ کریں گے۔ایک سنیئر اہلکار نے بتایا ’’برسوں کی لگن، انجینئرنگ کی مہارت، اور انتھک کوششوں کے بعد کشمیر کے ریل رابطے کا دیرینہ خواب آخرکار پورا ہو گیا ہے۔ وندے بھارت ایکسپریس جلد ہی اس تاریخی روٹ پر چلے گی ‘‘۔ خیال رہے کہ ناردرن ریلوے زون کے ذریعہ چلائی جانے والی اور دیکھ بھال کرنے والی، نارنجی اور سرمئی رنگ کی ٹرین جلد ہی اپنی تجارتی سروس شروع کرنے کی امید ہے۔۔انہوں ے کہا کہ سفر کا کرایہ ابھی طے نہیں ہوا ہے، لیکن توقع ہے کہ اے سی چیئر کار کیلئے 1600تک روپے اور ایگزیکٹو چیئر کار کیلئے 2500روپے ہوں گے۔کشمیر کے موسمی حالات کیلئے ڈیزائن کی گئی اس وندے بھارت ٹرین میں خاص اینٹی فریزنگ خصوصیات ہیں۔
