عظمیٰ نیوز سروس
جموں// جموں کے کوٹ بھلوال میں واقع ہائی سیکورٹی سنٹرل جیل کے احاطے سے بغیر سم ایک موبائل فون، ایک ایئر فون اور ایک اڈاپٹر ضبط کیا گیا۔ پولیس اہلکار نے منگل کو بتایاکہ یہ ضبطی پولی تھین بیگ سے کی گئی، جو جیل کمپلیکس کے اندر ایک کھلی جگہ پر پڑا تھا۔انہوں نے کہا کہ سینٹرل انڈسٹریل سیکورٹی فورس(سی آئی ایس ایف)کے اہلکار جو جیل کی حفاظت کر رہے ہیں،نے پولی تھین بیگ کو دیکھا اور متعلقہ تھانے کو مطلع کیا۔پولیس نے بتایا کہ ایک ٹیم موقع پر پہنچی اور پولی تھین بیگ کی تلاشی لی، جس کے نتیجے میں فون اور دیگر چیزیں برآمد ہوئے۔انہوں نے کہا کہ پولیس نے مقدمہ درج کر لیا ہے۔ موبائل فون کو تفصیلی تجزیہ کے لیے فرانزک ماہرین کے حوالے کر دیا گیا ہے۔پولیس نے مزید کہا کہ فوری طور پر یہ معلوم نہیں ہو سکا کہ پولی تھین بیگ کو جیل کے اندر سے کسی نے چھوڑا تھا یا باہر سے پھینکا تھا۔
