عظمیٰ نیوز سروس
کولگام// پولیس نے اتوار کو ایک اور گجر نوجوان کی لاش برآمد کی، جو گزشتہ ماہ جنوبی کشمیر کے اس ضلع میں دو دیگر افراد کے ساتھ لاپتہ ہو گیا تھا۔ نعش کی شناخت محمد شوکت ولد محمد صادق بجاد ساکن چٹا ڈونڈہ، راجوری (موجودہ ساکن چاندیاں پجن، قاضی گنڈ)کے طور پر کی گئی ہے، اتوار کی صبح کولگام ضلع کے مہ اشموجی علاقے میں ویشو نالہ سے اسکی لاش ملی۔قابل ذکر بات یہ ہے کہ گزشتہ ماہ قاضی گنڈ سے تین نوجوان ریاض احمد بجاڈ، اس کا چھوٹا بھائی شوکت احمد بجاڈ اور تیسرا شخص مختار احمد لاپتہ ہو گئے تھے۔ان کے رشتہ دار گزشتہ ایک ماہ سے ان کو تلاش کر رہے تھے اور انہوں نے مقامی پولیس سٹیشن میں گمشدگی کی رپورٹ درج کرائی تھی۔اسی نالے سے تین روز قبل ایک اور نوجوان ریاض کی لاش ملی تھی۔ تینوں کا تعلق راجوری سے تھا اور قاضی گنڈ میں مزدوری کرتے تھے۔تینوں رشتہ داروں کے گھر میں ایک تقریب میں شرکت کے لیے 13 فروری کو اشموجی، کولگام کے لیے روانہ ہوئے۔ تاہم وہ اپنی منزل پر پہنچنے سے پہلے ہی لاپتہ ہو گئے۔ ان کے لاپتہ ہونے کے بعد سے ان کے فون بند ہیں۔کولگام پولیس، ایس ڈی آر ایف اور این ڈی آر ایف نے لاپتہ تینوں کو تلاش کرنے کے لیے سرچ آپریشن شروع کیا۔اب تک دو لاشیں نکال لی گئی ہیں جبکہ ایک اور لاپتہ نوجوان کی تلاش جاری ہے۔
